Ki GNLA ki pyniap ia ki mrad ki mreng, ong u Clifford

Shillong 12 Jylliew:
U MLA ka Garo National Council (GNC) u Clifford R Marak u la ong ba ki lehnoh GNLA kiba rieh ha khlaw ha Garo Hills ki pyniap ia ki mrad ki mreng ban bsa ia la ka kpoh jongki.
“Ki dkhot ka GNLA ki pyniap ia ki mrad ki mreng kum ka bam na ka bynta jongki ba kin im hapoh khlaw”, la ong u Marak haba wanrah ia ka jingkylli hapoh ka iing dorbar thawain hynne ka sngi Palei.
U la buh jingkylli la ka tnad khlaw ka jylla kaba buh ia ki nongapkhlaw, ka ai ne em ki tiar ialeh ba biang ban khang lad ia kane ka kam jong ki GNLA ban iada ia ki mrad.
Haba jubab ia kane, u myntri ka tnad khlaw u Bah Prestone Tynsong u la ong ba ka tnad kam don ki tiar ialeh ba biang.
“Ngi shu pan jingiarap na ki pulit lada don kano kano ka kam kaba dawa ban leh kumta”, la ong u Bah Tynsong.
U Bah Tynsong u la ong ba kam don kano kano ka jingtyrwa na ka sorkar ban ai tiar ialeh ia ki nongap khlaw.
Hynrei ha kajuh ka por, u myntri u la ong ba ka sorkar kan shim ia ki lad ki lynti haba donkam khamtam ha kum kane ka jingjia khnang ban iada ia ki mrad.
U Bah Tynsong u la ong ka tnad kan pyntreikam pyrkhing ia ka ain Wildlife Protection Act, 1972 ban iada ia ki mrad.
“Ngi la pyntreikam ia ki kyndon ban iada ia ki mrad kum ha Wildlife Sanctuary bad ha National Parks”, la ong u Bah Tynsong.
U myntri u la air uh ia ki kyrteng jong ki mrad kiba don hapdeng ka jingma ban sa jah noh kynthup Slow Loris (Nycticebus caucang), Hog Badger (Arctonync collaris cuvier). Binturong (Arctictis binturong), Clouded Leopard (Neofelis nebulosa), Hoolock Gibbon (Hylobates hillock), Common Indian Monitor (Varanus bengalensis), Yellow Monitor (Varanus Flavescens), Water Monitor (Varanus salvator), Indian Rock Python (Python molurus linnaeaeus), Tiger (Panthera tigris tigris) bad Great Pied Hornbill (Buceros bicornis homrai).
“Ia ki kyrteng jong ki mrad ba don jingma la leh katkum ka surbe ba la leh da ka Zoological Survey of India ha u snem 1994,”, la ong u Bah Tynsong.
Halor ka jingkylli u MLAka NPP u James K Sangma, u myntri u la ong ba ka sorkar kam don kano kano ka jingthmu ban pynlong ia ka jingsurbe ia ki mrad.
U MLA ka UDP u Jemino Mawthoh u la buh jingkylli ia ka jingpyniap ia ki mrad da kaba lehniam, u myntri u la ong ba ka sorkar kam shah satia ia kum kane ka jingleh ban pyniap ia ki mrad.