“Ki Garo kim dei ban tuklar ia ka tynrai U Khasi Pnar ha ki Council”

Nongpoh, 16 Naitung:
Ka KSU North Kha si Hills District, hynne ka sngi, ka la pynpaw pyr shah ia ki Garo ba kim dei ban tuklar ia ka tynrai ki Khasi Jaintia, da kaba kin wan ban iakhun ha kane ka MDC elekshon ban wan ha ki ar tylli ki District Council, ba kynthup ia ka KHADC bad ka JHADC, namar kat kum ka jingpynkupbor ha Ri India katkum ka Riti Synshar ka Ri ka long ba ka KHADC bad ka JHADC ki dei kyrpang tang ia ki jaidbynriew Khasi Pnar.
U Samla Vincent Makri, General Secretary ka KSU NKHD, haba iakren bad ki nongthoh khubor ka District, u la ong ba ka seng kam kwah ban kdew kti iano iano na ki jaidbynriew Garo ban iakhun MDC na kitei ki ar tylli ki District Council, hynrei kim dei ban tuklar pat ia ka tynrai ki Khasi Pnar. U la pynshai ruh ba ki Khasi Pnar ki kynthup ia ki Khynriam, Pnar, Bhoi, War, Maram, Lyng ngam bad Diko, kine ki dei ki Khasi Pnar ba ïar.
Katkum ka sorkar India naduh u snem 1951 ka la pynkup bor kyrpang ia ki jaid bynriew riewlum ban don ka Sixth Schedule, ha kaba ka Meghalaya ka don lai tylli ki District Council kata ka Garo, Khasi bad Jaintia ba kynthup ia ka KHADC na ka bynta ki jaid bynriew Khasi, ka JHADC na ka bynta ka jaid bynriew pnar bad ka GHADC na ka bynta ka jaid bynriew Garo, la bynrap u Samla Makri.
U la bynrap ruh ba ka jingmih khubor ha kine ki sngi ba la dep, ha kaba ki ar tylli ki seng ba kynthup ia ka Ri-Bhoi Achik Union (RBAU) bad ka All Ri-Bhoi Achik Headman Association (ARBAHA) ki la kynnoh pyrshah ia ka mat ba la wan rah da u MDC ka Jaiaw u Bah Adelbert Nongrum uba la pyrshah ia ka jingiakhun elekshon ki Garo na KHADC, u la ong ba ha ka jingshisha katkum ka Sixth Schedule jong u snem 1951, ki jaid bynriew Khasi Pnar ba kynthup naduh u Pnar, u Bhoi, u War, u Lyngam, u Maram bad Diko ki don ha ka shatri jong ka United Khasi Jaintia Autonomous District Council, kaba hadien la tip kum ka Khasi Hills Autonomous District Council bad mynta kaba la phiah shuh shuh sa ia ka Jaintia Hills Autonomous District Council. U la ong ruh ba ka jingkren u Bah Nongrum, MDC ka Jaiaw ki long kiba shongnia.
Kumta, ki Garo ki la dei ban sngewthuh ba ki don la kajong ka District Council jong ki, khlem da donkam ban wan tuklar bad ki ar tylli ki District Council ha Khasi Jaintia ba mynta, namar ki hap ban iada ia la ka tynrai jong ki ha Rilum Garo ym ha Rilum Khasi, ha kaba ha katei ka jaka jong ki, ki don ia ka GHADC kumba ka sorkar India ka la dep pynkup bor, u la ong.