KI DROK

Sphondar Thongni

Dang shen ki Drok ki la ïoh jaka ban rung ha kane ka ri Khasi Jaiñtia.Ha kane ka juk stad mynta la wan poi ki jingsniew babun jait bad ki jingthala babun rukom.Ki jingdih kiba khyllah kiba kynsha bad kiba pynlamwir ïa ka jingim briew ka imlang sahlang bad ka jaitbynriew hi.Ha ka jingshisha ka ri ka ap khmieh lynti ba ki khun samla kin long ka lawei ba phyrnai ïa ka jaitbynriew hynrei kumba ka long mynta ka lah long markhongpong.

Ha kane ka juk mynta khamtam ki samla shynrang Kim kham sngewtynnad shuh ban pynlut por ha ka pule puthi,kim kwah shuh ban trei da ka bor met,Kim treh shuh ban pynshitom ïalade haba ki trei.Kim sngew bang shuh ban im ka jingim babha ba don akor don burom.Kumba long mynta ki briew ki kham jied ïa ka ban pynsngewbha ïa ka doh ban im ka jingim kaba lyngkar.Ka thoh-tim ka nang jyllei.Kajingdih buaid ka la ngam ha ka long briew man briew bad ka jingdih Drok ka la nang kharoi. Ki Drok ki long ki jingdih kiba pynshyrkhei ïa ïa ka jaitbynriew.

Ngi long ka jaitbynriew ba tang shitroh bad Lada ym lah ban bat lakam ïa ka jingdih Drok ha ka por babiang ka jaitbynriew kan kiengberong.Ki Drok ki long ka jingpang kaba kham sniew kham shyrkhei ban ïa kano kano ka jingpang.Uno uno uba ïa lang lok bad uba dih Drok u ngat ha kane ka jingpang.Kiba dih Drok khamtam kito kiba la kyrni ki kwah ban pynngat lang ïa kiwei khamtam ïa kito ki babha.Namarkata ngi donkam ban kiar bad husiar ba ngin lait na u Drok. Ki Drok ki bun rukom.u Kynja (hahish)bad ka Kani (morphine)ki long ki jingdih kiba pyndonkam kynrei ha ki jaka ka ri jong ngi.Don kiwei pat ki jingdih kum u Charas bad Chandu. Mynta ki pyndonkam kynrei ïa u Marihuna da kaba dih ha ka shlim.Haba dih ïa une ka ktah ïa u klongsnam bad ka pynmih ka jingtied haduh 140-160 sien tied shi minit.

Don pat ba ki pyndonkam da ki jait Kuli dawai ba don ka Barbiturates kiba don bun rukom kum u Nembutal,Leconal,Luminal,Ameytal, Butisol bad kiwei kiwei.Don ruh kiba pyndonkam ïa u Mandrax. Kine ki jait Kuli ki long kiba pynkieng khlieh, pynlamwir bad pynmynsaw ïa ki dkhot met u briew.Hynrei u jingdih uba shyrkhei tam ïa baroh u long u L.S.D. (Lisergic Acid Diethylamide).Kiba bun kiba dih ïa une u kuli ki ïap.Kadaw ka long ba u ktah ïa ka jabieng u pynkieng khlieh bad u pynlamwir.Haba u ïohi ïa ka sim u kwah ban her,haba u ïohi ïa ka duriaw u kwah ban ngam ban jngi kum ka dohkha.Haba u ïohi ïa ka riat u kwah ban ryngkoh kai kum ha madan.Bunbah kiba dih Drok kiba ryngkoh kai na ki khalki kiba bun mala bad ki shu ïap ei.U L.S.D.u pynmatlah ïa ki khmat bad u pyntroiñ ïa ki dkhot met bad u pynduh ïa ka jingïoh khun. Ki kmie ki kpa ki dei ban peit bha ïa la ki jong ki khun haba ki la sdang ban khie samla ki dei ban pynlut ka por ban ïatei ïa syllok bad ki ba kin kiar na ki jait jingdih kiba sniew kiba long ka jingma jingmynsaw ia ka jingim briew bad ïa ka imlang sahlang.

Kyntang ïawai nga buh ka jingkyrpad bad ka jingsyllok ba kum ki Samla ngi dei ban kiar laimaw laidieng lailum laiwah na u Drok bad ki jait jingdih basniew baroh. Khnang ba ngin lah ban kyntiew ïa ka imlang sahlang kaba khuid.Ngi dei ban shim jingkitkhlieh ban ïa syllok khamtam bad kito kiba la ngat ha u Drok bad ki jingdih basniew ba kin phai bad ihnoh ïa u bad ban im noh ka jingim bathymmai.Ngim dei ban niewbeiñ niewpoh ïa kito kiba la kyrni ha ki jait jingdih hynrei ngi donkam ban leit ïa syllok marmet bad ki ba ngin ai ka councelling na bynta jong ki ba ki dei ban ih noh ïa ki.