Ki Dorbar Shnong, ki dei ban trei la ki kam:Ka rai Kashari kan neh shipor

Ki Dorbar Shnong ha ri Khasi-Jaintia ki don mynta ha ka umdum,
haba ka High Court jong ka jylla ka la pynmih ia ka rai ha ka 10.12.2014, ba ki Rang bah Shnong ki trei khlem da ioh bor na kano kano ka ain, kumta kim don bor ban trei ia ki kam kiba iadei bad ki ain Sorkar, hynrei tang ia ki kam shnong kam thaw, imlang sahlang “confine themselves for social development”, ong ka hukum u nongbishar. Ka
hukum ka la mana ruh ia ka Sorkar jylla, ba kim dei shuh ban dawa na ki paidbah ia ki NOC Rangbah Shnong (R/S) bad ba ki dei ban peit ba ki kam ki dei ban iaid beit katkum ki ain ki kanun. Kane ka hukum trei
kam kan long salonsar, kum ha ki kam register khyndew, khakhun ne ha
ka iap ka im, shna ing, ring ding ilektrik, ki certificate shongshnong bad kiwei kiwei de.
Haba la peit bha ia ka hukum Kashari, ka paw ba la slied lyng khuit phar ia ka bor treikam ki Durbar bad ki R/S, kaba ki ju trei baroh shi katta.
Ka Sorkar
Ha Ka Khim Khait:
Kumno ka Sorkar Megha laya kan leh mynta, lada kam lah shuh ban ioh ia ka jingiarap ki Durbar Shnong(D/S) bad ki R/S?
Mano ban peit lada thang dusmon ia ki khlaw ki btap, kiba tuh dieng, kiba pynkhalai, khaii kiad, drugs, iashoh iadat, iapyniap, kiba pynjot ia ki mar Sorkar, ban pun lynti lyngba ki khyndew shnong ne ban ring um na ki jaka shnong, ban peit ia ki riewsniew ba rung bad rieh hapoh shnong, ban iarap pyntrei kam ia ki skim Sorkar babun jait, ia ki BPL (baduk) bad ia kiwei-kiwei kiba ki jing treikam ki iaid ryntih
baroh shi katta?
Duhnong mano, ka Sorkar ne ki D/S bad ki R/S? Kine ki dei ki
jingeh kiba mih na katei ka hukum, kaba la pyn dam noh ia ka rukom
iatreikam hapdeng ka sorkar bad ka bor shnong bor paidbah, (practicability issue among the government, the recognized traditional bodies and the people).
U D.C. ka East Khasi Hills District u lah da pynmih hukum shaid shaid sha kitei ki tnad Sorkar ba ki dei ban kohnguh ia ka hukum
ka High Court. Kiwei ruh lehse ki la leh kumjuh hi. Ngin ia peitkai,
kumno ki kam kin long, namar ki D/S bad ki R/S kim don iktiar shuh halor kitei ki jait kam.
Ka 6th Schedule
(Pynkap Bahynriew)
Hapoh ka Constitution ka ri India, la pyn rung da ka Sorkar India ia ka Pynkap ba hynriew (6th Schedule), kaba long ka stieh iada kaba ai bor ia ki District Council ha baroh ka thain North-East.
[pule ruh sla 5]