Ki dohkha: Ka daw balei phi donkam ban bam bun ki dohkha

Kong Linda Kongwang

Ki dohkha kidei kiwei na ki jait jingbam kiba ai jingmyntoi shibun naka bynta ka jingkoit jingkhia jongka met. Ki dei kiba don bun ki proteins bad ki nutrients kiba kongsan kum ki Omega3 fatty acids bad haka ki don kyrhai ki tynrai jongki proteins kiba lah ban ai jingkoit jingkhia iaka met ka phad bad pynkhlaiñ ruh iaki dohksah jong phi. Ka jingbam kynthup bun ki dohkha ymtang ba ki pynbit pynbiang iaka met ba shabar hynrei ki iarap wat iaki bynta ba shapoh jongka met. Hangne ki don katto katne ki jingai jingmut balei phi dei ban kynthup bun ki dohkha haki jingbam ba man ka sngi jong phi.

1. Pynduna naki jingma ban ioh iaka jingpang klongsnam: Katkum ka jingpule bniah bala pynmih daka American Journal of Cardiology,ban bam iaki dohkha kadon jingiadei bad ka jingduna kiba ioh jingpang klongsnam. Kadei kaba kyntiew iaka koit ka khiah jong u klongsnam namar haka kidon kyrhai ki Omega3 fatty acids kiba lah ban pynduna iaka jingtyrha ne thang ki bynta ba shapoh jong ka met. Ka iada ia u dohnud bad pynduh pyndam iaki jingpang ba beh slem.
2. Ka pyllait naka jingshahktah jong ka jingpang Alzheimer: Ka dohkha kadei ruh ka jait bam tei met kaba kongsan naka bynta ka jabieng. Katkum ka jingpule bniah ha u snem 2016 bala pynmih daka Journal of the American Medical Association, ban bam iaki jait jingbam duriaw ne naki wah ka pyllait naki jingma ban ioh iaka jingpang Alzheimer. Ka jingpule ka shem ruh ba kito ki briew kiba bam dohkha man ka por, ka jabieng jongki ka trei kam bha kaba lah ban pynduna naka jingkynran bad sniew jong ka jabieng kaba lah ban ialam sha ka jingthut ki thit jabieng.
3. Ki iarap pynduna ban don iaka jingkhuslai jingmut (depression): ka jingbam iaki dohkha kadei ruh kaba biangtam naka bynta ka jingkoit jingkhiah jong ka jingmut jingpyrkhat. Katkum ka Journal of Psychiatry and Neuroscience, ki shem ba ka khlein naki dohkha ka iarap ban kyntiew iaka jingkoit jingkhiah jong ka jingmut jingpyrkhat kaba lah ban shim lang bad ka Selective Serotonin Reuptake Inhibitor (SSRI) kiba dei ki jait Antidepressants.
4. Ka dei ka tynrai bakhraw jongka Vitamin D: Katkum ka jingpule bniah bala thoh daka National Institute of Health, ki dohkha ki son kyrhai haka ki Vitamin D, bad latip kum kawei nakiba bha tam eh naka bynta ki jingbam tei met kiba dei ki nutrients kiba kongsan ban kynthup haki jingbam jong phi. Ka jingpule ka kdew shai ruh baka Vitamin D na ki dohkha kadei kaba ai jingmyntoi naka bynta ka jingkoit jingkhiah jong ki shyieng bad jingsan jongka met. Kan long ka jingmyntoi kaba khraw lada phi khleh lang iakane ka nutrients haki jingbam jong phi. [yn dang bteng]