Shillong:Dang shen, ka Khasi Hills Autonomous District Council (KHADC) ryngkat ka Hima Mylliem ki la rai ba baroh ki dukan ha Iewduh kaba dei kaba heh tam ha ka jylla, ki dei ban khang noh hapoh 10 baje mynmiet bad ban ym shah shuh ban pynlong jaka sahmiet ha ki dukan naduh ka 1 tarik Jylliew 2024.
Kane ka rai ka long ban tehlakam ia ka jingkynrei ki nongtuh nongthiem, ki runar ruser, bad kiwei ki kam beain kum ka jingiakhalai bad ki nongdih drok.
Halor kane, la ioh ban iakren bad ki nongshong iew, kiba la pynpaw ba ka Iewduh kam long shuh kaba shngain kum ha ki por mynshwa. Mynta ha Iewduh, ki dukan ki hap ban khang kham kloi namar ba la bun ki kam runar, bym lah shuh ban sngew shngain.
“Mynshwa ngi sngew shngain bha ban shong dukan bad ngi khang 10 baje mynmiet ruh hynrei ha kine ki sngi, kam long shuh, 7 baje ngi la hap ban khang noh”, la ong iwei I kong, iba ju shong dukan naduh ki snem 80 eiei, iba sah ha Nongrah.
Ki nongshong dukan, ki la pynpaw ba ka rai jong ka District Council bad ka Hima Mylliem, ka long kaba bha eh, lada ki lah shisha ban pyntreikam ia ka rai, namar ba mynshwa ruh ka la don teng ka rai ban ym shah shuh ban pynsah briew ha iewduh hynrei, kam shym la treikam satia, bad kiba bun ki dukan kila pynsah briew.
“Ki dkhar ki leit trei kylleng ka sor Shillong myn sngi, ynda la miet ki wan thiah ha Iewduh bad mynstep, ki leit pynjaboh pathar ha lynti syngkien”, la ong u rangbah ba die syiar.
Katkum ka jingiathuh, la sngewthuh ba kiba bun ki dukan ha Iewduh ki ju pynlong ruh ka lad kamai ban pynsah briew mynmiet ynda la khang, katba myn sngi pat ki kamai da kaba die ia ki tiar ki tar, ki mar ki mata.
“Tang 8 baje mynmiet ym nud shuh ban shong dukan, namar ba la jur ki kam tuh kam thiem, ki nongdih drok ki pyllong ia ka iewduh kum ka jaka leh sngewbha namar sha shnong la tehlakam”, la ong une u rangbah ba ju shong dukan.
La iathuh ba ha kawei ka dukan, ki don kiba ai sah ia ki briew ki bym tip eiei, naei ki wan bad kiba dei kumno kumno ruh. Kumba la sngewthuh, kiba bun ki dukan ha Iewduh ki dei ki jaka sah miet ia ki briew kiba wan naei re naei bad kiba la wanrah ym tang ia ka jingjaboh hynrei ia ka jingshong syier ruh.
“Ka biang bha ka rai ban khang dukan bad ban ym shah ban sahmiet shuh ha iewduh, lada lah ban pyntreikam”, kila la ong kiba bun ki nongshong iew.
Ka Iewduh ka dei ka kad khaïi kaba heh tam ha ka jylla, ha kaba ki briew na kylleng ka ri Khasi Jaintia ki wan siew wan tda, ban kamai kajih. Kane ka iew ka la nang kham khim nang khapngiah ha kine ki sngi namar ka jingnang mih bun ki dukan, bad ka jingnang bun kiba shong die jingdie madan, naduh ki bym dei Khasi ruh kumjuh.
Nalor ka jingbym sngew shngain tang shu dum ha iewduh, kaba pynshat khmat bha ha kane ka iew, ka dei ka jingjaboh watla ka bor Hima ka la ialeh katba lah ban lum ia ki jaboh, ki jabain man ka sngi. Dang shen, ka North Eastern Council ka la mang T.11 klur ban pynbha briew, ban pynitynnad ia kane ka iew. Kane ka iew ka dei ruh kum ka jaka wan jngohkai ki briew nabar, kiba wan poi iuhkjat sha kane ka jylla, namar ba ka dei kaba la rim bad kaba donkam.
La ju iohi ruh ba ki nongwei nabar jylla bad kumjuh nabar ri, ki ju leh vlog ban ring video ban pyni ia ka jinglong ka die ka thied, ka jinglong jingman jong kane ka iew. Khlem pep, lada lah ban pynitynnad shisha, kan nang kham khring shuh ia ki briew kylleng ia ka jingpaw nam jong kane ka iew.
Kat dang iaid ki por suki2 lah iohi ka synshar khaddar ka lah hiar…Kan poi ka por kumba jia ha Manipur kan don ka jingialeh hapdeng u poiei bad ki trai muluk…sa peit kane ka dei ka future prediction namar ki nongmihkhmat ba mynta lait noh ka party u prah kim I don ka jing peit jngai…Ki lah biang ialade ka mut um lei2 lada iap ka jaidbynriew.
wake up ioh shah wake up ha u BJP