KI DEI TANG KI MARAM POIEI SUDA, ong i longkmie na Lumsohriew

Da u Samla Scholar Lawriniang,
Nongthliew

Watla ngam dei na ka Hima Maharam, hynrei nga da kyndit thred kumba nga ioh ïuh ia u mrad kynsha aiu re aiu haba nga iohsngew bad iohi ia kawei ka jingkren byrthen tyngeh i wei na ki longkmie khasi ba la kham ïaw rta na shnong Lumsohriew i ba la ong ba ki Maram ki dei tang ki POIEI suda, kane jingkren ka ktah haduh katta katta ia ka longbriew manbriew bad ka imlang sahlang namar kum kine ki jait jingkren ki wanrah ia ka jingsngew iapher jaitbynriew wat hapdeng ngi para khun khasi khara.

Ka jingkynnoh ki maram POIEI ka dei ka kyntien kaba niewpoh niewbeiñ bad ka kyntien kaba poh tam ha ka longbriew manbriew, nga lah ban ong ba ka kham kordor shibun shah ki mrad ban ia kita ki Poiei, namar ki mrad ki don la ka sem ban shong ban sah ban thiah ban dem, hynrei ki poiei kumba kynoh i tei i longkmie kim shym long kumta namar ka kyntien Poiei hi ka thew ne mut ba ki dei kita ki bym shym la don iing don sem bym don ka jaka shong jaka sah, kiba shu wan poiwir poi hap nangno re nangno bad kiba thiah ia ki madan madiah ki khlaw ki btap bad ki kharai tohtih kat haba lap ba shem bad kiba shu ap khrong wat ia ka bam ka dih kita ki dei ki poiei kumba la ong da i tei i longkmie. Hynrei haba phai pat sha ka jingkynnoh thala jong i tei i longkmie ba ki maram ki dei tang ki Poiei ka long kaba bakla shibun eh kane ka jingkren kam shym la ktah tang ia kiba na ka hima Maharam hynrei ka ktah ruh wat ia ka longbriew manbriew bad ka imlang sahlang baroh kawei namar ka dei ka kyntien ba pynpait pynjot pynpra bad kaba pyniapher wat ia ka jaitbynriew baroh kawei.

Ha ka jingshisha lada don kano kano ka jingiania ne jingbymsngewthuh jingmut hapoh shnong poh thaw, kum ki longkmie ba la iaw rta ki ba long ki nongsaindur ia ka iing ka sem ki la dei ban tyngkai bha ia ka rukom kren ha shwa ban kren khnang ba kan ym ktah mationg iano iano, namar ban shu padiah ia u thylliej khlem bai wai ka long kaba Ma! namar dei ka jingbymlah ban teh lakam ia u thylliej ka juh wanrah ka jingjot jingpait jingpra wat ia ka iing ka sem ka shnong ka thaw ka ri bad ka jaitbynriew.

Kumta haba iadei bad kane ka jingkynnoh ngi dawa ba dei ban panmap mardor halor kane, khnang ban wanrah pat ia ka bha ka miat ka suk ka sain ha ka longbriew manbriew. Bad kyntang ia wai lyngkot eh ngim dei ban ailad kum kine ki jait jingkren kiba niewbeiñ niew pohjait ia kiwei, namar kine kin sa wanrah ia ka jingsngewpher jaitbynriew hapdeng jong ngi para khasi.

Kren don akor iano iano, phin ym duh nong eiei,
Kren sarong, phin kit da khoh pei.