Shillong: U MLA ka Shillong West konstitwensi u bah Mohendro Rapsang u la ong ba ki briew kiba tied klep ia u hynmen jong u, u bah Rishan Rapsang ha ka miet sngi balang ki dei beit ki nonglute namar ba kumba ka paw ha ka CCTV kaba pyndait ha phyllaw ing jong ki, u la ong ba utei u briew marsien dep tied u kthong beit ia ka pla pisa bad u phet krad. “Ki dei beit ki nonglute, u briew u kthong beit ia ka pisa” ong u bah Mohendro Rapsang haba ia kren bad u Rupang.
U Bah Rishan Rapsang (sha ka diang) uba dang shah bom ha u runar ba tap khmat, ba la ioh ring dur lyngba ka CCTV
U bah Rapsang u la ong ba mynta u hynmen jong u -u dang don hapoh Woodland Hospital hynrei u la kham jem bad ki doktor ki la ong ba um lei lei shuh, “Ki doktor ki ong ba ym lei lei shuh hynrei i dang don hapoh Hospital, lashai tharai ngi lah ban mih noh” u la ong. Haba kylli katno lak tyngka ka pisa kaba don ha ka pla ba utei u nonglute u la ioh rong tuh, u bah Rapsang u la ong, ‘I Bahdeng im pat lah kren eiei mynnin , mynta ruh ngim pat ia kylli, ngin tip lashai tharai katno ka pisa ka don da i la lah bha ban kren” u la ong.
U bah Mohendro Rapsang u la iathuh ruh ba marsien dep jia ka jingjia ha ka miet sngi balang, ki pulit ki la poi sha katei ka jaka ban leh ia ki jingdonkam baroh bad na ka liang ka ing ka sem ruh u la ong ba ki ai ka jingiatreilang bad ki pulit ban ioh kem ia ki briew kiba donkti ha katei ka kam. “Ngi la ai ka dur jong ka CCTV ruh ha ki pulit, ngin ai baroh ka jingtreilang ban leh ia kaba donkam” u la ong. Haduh mynta u la ong ba ki pulit kim pat ioh kem ia u briew uba donkti ban leh ia katei ka kam, “Nga shaniah ia ki pulit, ai ba ki pulit kin leh ia kaba donkam” u la ong.
Lah ban kdew ba ha ka miet sngi balang ha ka por 7:30 baje eiei, u la don uwei u runar uba la sop ia ka durkhmat jong u bad uba la ap thap lypa ha phyllaw ing jong u bah Mohendro Rapsang kaba don ha Jaiaw Langsning bad marsien rung u bah Rishan Rapsang utei u briew u la bom da u kynja nar rod na shyllang jong u bad u la knieh ia ka pla pisa bad phet bak. U bah Rishan u la mynsaw jur bad la pynkit ia u sha Woodland Hospital.
U Rapsang u la ong ba kumba ju long manla ka sngi u hynmen jong u, uba la tip kum u Bahdeng Rapsang hadien ba u la dep ia ki kam ki jam napoh ophis manla ka miet u ju rung ha ing kmie kaba don ha Jaiaw Langsning bad ha katei ka miet ruh u leh kumba ju leh manla ka sngi hynre iu la ia tyngkhuh noh ia katei ka jingjia.
Ka Meghalaya Pradesh Congress Committee (MPCC), ka pynrem jur halor ka jingktah kti ia U bah Rishan Rapsang (Bahdeng), uba dei U President ka West Shillong BCC bad uba dei ruh u hynmen jong U bah Mahendra Rapsang MLA jong katei ka Constituency, kaba la pynlong ia u, ba un hap leit shah sumar sha Hospital.
Ka MPCC, ka dawa na ka sorkar, ba kan pynshitom ia kitei ki runar bad ban pynsaja katba kum ki kyndon ain.