“Ki dei ka lynti iaid jongnga ban pynbha ia ka Constituency”

Shillong, 07 Risaw:
U MLA bad MDC jong ka Mawlai Constituency, bah Embhah Syiemlieh haba kynthoh halor ka jingshah weng kum u President jong ka UDP Mawlai Circle, u ong “Ka dei ka lynti iaid jongnga na ka bynta ban pynbha ia ka Constituency”.
U la iathuh ba u la shimti kum u President jong ka UDP Circle Mawlai na ka bynta ban pynkhlain ia ka party bad ka jingkynnoh bad pyntlot ia ka party ka long ka bym don nongrim, u la ong ba u sngewnguh ia kito kiba iatreilang bad u na ka bynta ban kyntiew ia ka party ha ka constituency.
“Kito ki jingkynnoh pyrshah ianga, ki dei tang ki jingthmu ban ialam bakla bad ki long ki bymd on nongrim satia” la ong shuh shuh u bah Embhah uba la iathuh ba, ki Unit bapher bapher jong ka UDP ha ka Constituency ki dang ai ka jingkyrshan kaba pura ia u kumu nongmihkhmat bad kumjuh ruh kum u nongialam jong ka party ha ka Constituency.
Haba pynrem ia ka jingialang ha ka sngi saitjain kaba la rai ban weng noh ia u na kam president jong ka UDP Mawlai Circle u bah Embhah u la ong ba kane ka jingleh, ka dei tang ka jingthmu ban pynjah burom ia u MLA bad kumjuh ruh ia u MDC jong ka Mawlai Constituency.
“Nga la treibha kum u MDC bad ngan bteng ban iaid ia kane ka juh ka lynti kum u MLA” la ong shuh shuh u bah Embhah Syiemlieh haba kren ha ki nongthoh khubor hadien ba la wai ka dorbar mynta ka sngi ha Assembly.
U la iathuh ruh ba kine ki briew kiba kynthoh pyrshah ia u, ki dei ki juh ki briew kiba kynthoh pyrshah ia u bah Founder Strong Cajee bad kumjuh ruh ia u bah Proces T Sawkmie ha kip or kiba la dep.