“Ki dawai ki biang?” kylli ka kong Roshan ia ki nongpang

Shillong, 07 Nohprah:
Ka Shillong Civil Hospital ka long kawei na ki jaka sumar ka Sorkar kaba khring ia kiba bun ki heh sorkar ban leit jurip khah khah ia ka hynrei katkum ka jingtip, kam da don than ka jingkylla ha ka rukom pynbiang ia ki tiar bad kiwei ki jingdonkam ban shakri ia ki nongpang.
Dang ha u bnai Nailar mynta u snem, u Myntri rangbah ka jylla u la leit jurip jar jar ia kane ka jaka sumar, ha kaba u la kular ba ka sorkar kan pynlong ia kane ka jaka sumar kaba biang bha. Nangta ka mynri khynnah ka tnat ka koit ka khiah ka ri, ka Anupriya Patel ka la wan jurip ia kane ka hospital ha u Nailur mynta u snem.
Mynta ka sngi, ka myntri ka tnad ka koit ka khiah ka jylla ka Kong Roshan Warjri, ka la pynlong ia ka jingjurip ia kane ka hospital ha kaba ka la iakren ruh bad ki nongpang. Ka jingjurip ka long ruh ban tip ia ka jinglong jingman jong kane ka hospital sorkar kaba heh tam ha ka jylla.
Ha kane ka jingjurip, la synrang lang ia ka Kong Roshan da ki ophisar kynthup u Bah HM Shangpliang u Mission Director ka MHM, u secretary Bah KW Marbaniang, bad ki doktor. Ka myntri ka la lap ruh ba don bun ki jingduna ha kane ka jaka sumar naduh ka jingkhuid ki jaka leit shabar ne painkhana bad kiwei ki jingdonkam.
“Kumno ki dawai ki biang, ki jingdonkam ki biang”, la kylli ka Kong Roshan ia ki nongpang ba thiah ha kane ka jaka sumar.
Katkum ka jingjubab ki nongpang, “Ki dawai ki biang hi bad ki ioh ia ka bam”.
Haba kren sha ki nongthoh khubor ka Kong Roshan, ka la ong ba ka jingjurip jongka, ka long ban tip ia kane ka jaka sumar ha kano ka rukom ka long bad ka sorkar kan sa pyrshang ban leh ia ki jingdonkam ba duna katba lah ban pynbiang ia ki jingdonkam jong ki nongpang.
U Myntri Rangbah ha ka por ba u wan jurip ia kane ka jaka sumar, u la ong ba ka sorkar kan pyntreikam noh ia ka ‘Hub–Spoke’ ban pynthikna ba ka jingshakri jong kane ka jaka sumar kan long kaba biang bad kaba bha tam.
Kane ka jaka sumar ka don hapdeng ka jingduna ki doktor namar ba ki don tang lai ngut kiba leh ia ka jingpuid bad ka don ruh ki nurse tang 146 ngut.