Ki dawai ba la kut por ai ka Civil Nongpoh

Nongpoh, 3 Jylliew:
Ki nongialam ka KSU Nongpoh Circle, mynta ka sngi ki la pynpaw ia ka jingsngewkhia kaba jur hadien ba ki la lap ba ki bor pyniaid ka Nong poh Civil Hospital, ki dang sam ia ki dawai ba la kut por sha ki paidbah nongshim dawai na katei ka jaka ai jingsumar ka sorkar.
Ia kane ka jingai ia ki dawai ba la palat ka por ka la paw pyrthei hadien ba ka seng ka la ioh jingujor na kawei ka nongshim dawai kaba la leit shim dawai ha ka 1 tarik mynta u bnai, ha kaba katkum ka jingujor da katei ka nongleit shim dawai la lap ba ki bor pyniaid ka Nongpoh Civil Hospital, ki la sam pynban da ki dawai ba la kut por khlem da peit bniah ia ki dawai ba la kut ka por.
Haba iadei bad kane na ka liang u President ka KSU, Nongpoh Circle, u Samla Banpynshngain Lyngdoh, u la ong ba ka seng kam lah khlem da pynpaw ia ka jingsngewkhia halor kane ka jingleh torti da ki bor pyniaid ka Nongpoh Civil Hospital, ha kaba ki la nud ban sam da ki dawai ba la kut por khlem da pyrkhat shuh ia ka jingma ka ban ap lada ki pyndonkam ia ki dawai ba la kut por.
U la ong ruh ba kane ka dawai kaba la kut por ka dei ka dawai Clovit Cream, kaba dei ka dawai kyllan sniehdoh, ha kaba la lap ba kane ka dawai ka la kut ka por ban pyndonkam mynta la lai bnai.
Kumta, na ka liang jong ka seng shen kan sa leit ban kynduh ia u DMHO ka Nongpoh ban pan ka jingpynshai halor kane ka jingsam ia ki dawai ba la kut por bad ha kajuh ka por ka seng ka dawa ruh ba ki bor pyniaid ka Nongpoh Civil Hospital, ba ki dei ban shim jingkitkhlieh lada jia ei ei ia ki paidbah kiba la kum pyndonkam ia ki dawai ba la kut por, pynkut u samla Banpynshngain Lyngdoh.