Ki daw balei ba nga thoh ‘Ex.Rev.’

La thoh da u Ex.Rev.K.Langrin,
Seiñduli, West Khasi Hills District.

Nga la iohi ha ka facebook ba la mih uwei u rangbah uba kyrteng- Joyful bahdeng uba la thoh sha nga, ” Ha u Ex.Rev.K.Langrin, Seiñduli, West Khasi Hills District. Da kane nga kyrpad ia phi ba phin sngewbha ban ai jingpynshai ka mut aiu – Ex.Rev. Namar ki la don bun ngut kiba kylli na nga hynrei ngam lah ban pynshai. Kita kiba kylli ruh kim nud ban thoh ha ka facebook hynrei ki kylli ha messenger. Lehse don kiba kylli ia phi ruh. Kumta phin sngewbha ban ai jingpynshai ma phi u trai ha ka facebook khnangba kiba kylli kin sngewthuh.”

Joyful bahdeng, nga pdiang sngewbha ia kato ka jingkylli jong phi bad jong kita kiwei ruh kiba kwah jingshai balei ba nga thoh ialade “Ex.Rev.” Ka long kaba shisha ba ki la don kiba kylli na nga lyngba ka messenger. Te nga la jubab lyngkot ia ki, “Leit kylli shwa na kito kiba thoh- Ex.Sordar, Ex.Headmaster, Ex.MLA, Ex.Minister…”

Ym dei tang ma phi bad kita kiwei kiba kylli, hynrei lada phi dei ki riew pule khubor te phi la dei ban iohi ruh ia ka jingkylli jong u bah D.Lyngdoh, Nonglyngkien bad ia ka jubab jong nga ha u snem 2018 ba la mih ha ki kotkhubor Khasi.

Balei ba bun ki kylli, “Ka mut aiu Ex.Rev” ha kine ki sngi, namar ba nga dei uwei napdeng kiba shait thoh article ha kine ki sngi jong ka khlam. Nga sngewthuh ba ki don kiba kylli namar ka jingduna ka bor sngewthuh jong ki bad ki don pat kiba kylli wad daw ia nga. Te ka jingpynshai jong nga ka long ia baroh arjait kiba kylli.

Paralok, ka jabieng jong nga ka long kum ka parashut. Kaba mut kaba treikam haba la don ba kylli jingkylli. Human mind is like a parachute, it works only when it is opened.

Ko phi kiba kwah tip balei ba nga thoh “Ex.Rev.” ki don ki daw. Ha kaba nyngkong haba nga thoh article ha ki kot khubor nga la thoh “Ex.Pastor”. Ha kawei ka sngi nga la iakynduh ia uwei u nonghikai jong nga uba long u Pastor rangbah ka Synod, u la ai jingmut ia nga ba kan kham bha ban thoh “Ex.Rev.” namar ka “Ex.Pastor” ka thew ia ki Pastor Fellowship. U la ong ia nga, “Haba phi la long pastor ha ka balang Presbyterian bad ruh ha ka Balang U Blei (Ecclesia) te ka bha ba phin thoh noh ‘Ex.Rev.’ namar kine ki dei ki mainline churches. Ha ki kam skul pat nga thoh beit “Babu K.Langrin”. Kata ka shong ha ka mon jong nga u trai ba kiwei kim don hok ban interfere.

Lada ka jingpynshai jong nga ka kut noh tang kumtei nga ngeit ba phim hun. Te mynta ngan ai noh da kaba kham bniah. Paralok, to tip ba ka jingmut “Ex.Pastor” lane “Ex.Rev.” ka mut “Experienced pastor.” U bah D.Lyngdoh mynshuwa u la ong ia nga, “Ym pat don mano mano ruh ha ri Khasi bad Jaintia uba thoh kum phi.” Kata ka long kaba shisha ba ym pat don namar kiwei ki long pastor tang ha kawei ka balang. Hynrei nga nga la experienced ha ka kñia ka khriam, nga la experienced kum u pastor jong ka balang Presbyterian bad jong ka Balang U Blei (Ecclesia). Kino kino ki bym ngeit ale wan ha ïing jong nga ha Seiñduli ba ngan pyni ia phi ia ki 32 jait ki jingkñia Lyngngam, kito ba nga la thoh ha ka kot ‘Uei u Lyngngam’. Lada phi kwah ia ka jinglehniam jong ka Balang Presbyterian bad Balang U Blei (E) ruh nga kloi ban pyni.

Phi lah ban kylli ia nga, “Hato ia u nongkñia yn khot Pastor?” Ngan iathuh ia phi kumne- Ha ka snem 1989 haba nga dang long pro pastor ha ka Balang Presbyterian, nga la leit rung ha kawei ka ïing jong ka kur jong nga ha Nongkrong. Hangta u don u ma Sain Langrin uba long u nongkñia bad u nongleh byllei uba la wan kñia ha kata ka ïing. Mar ia rung ma nga u la khublei ia nga bad u la ong, “Ngi iakynduh para pastor mo”.

Paralok, ym don uwei ruh ha ri Khasi bad Jaiñtia uba la experienced kum nga. Dei tang ma nga uba nud ban thoh “Ex.Rev”, namar nga la experienced ha ka kam kñia 10 snem, ha ka Balang Presbyterian 16 snem kum u pastor bad ha ka Balang U Blei (E) 4 snem kum u pastor.

Ka daw ba ar pat balei ba nga thoh “Ex.Rev.” Paralok lada phi don jabieng phi dei ban sngewthuh kumne: Lada weng noh ia u E na u Ex, sah sa tang X. Kaei ka jingmut jong u X? Ka mut uba la tymmen keiñ. Nga mynta nga la dap 60 snem karta, kaba mut ba nga la poi ha u X category. Sa tang khyndiat ki snem ba ngan jam noh ha u Y category lane ban wai noh ka jingim. Ka last category dei u Z kaba mut ngan poi sha Zion. Lada phim pat sngewthuh ia kane te phi la dei shisha ki sniang bam jawa (sniang jyndem).

Kaba khatduh, ym kaba khatduh tam, ki don kiba ong ia nga, “u Ex.Rev” u dei uba sniew jinglong. Hooid ia kata nga pdiang, tangba phi sngewthuh ne em ia ka jingong “No single person is totally good or bad”. Ym don u briew uba bha 100% ne uba sniew 100% ha kane ka pyrthei.

Khnang ba phin sngewthuh ngan ai da kawei ka nuksa. Ha ka snem 2011 nga la iakynduh ia uwei u pastor ha Motphran. Uta u la wer dih sha bad bam chow ia nga ha kawei ka restaurant. Ynda la dep bam chow bad dih sha uta u pastor u la ong ia nga, “Ei lok nga te ngam don pisa ho. Sa siew ma phi ia ka bai chow bad baisha.” Wer te wer ma u, hap siew pat ma nga 220 tyngka. Sa ha ka snem 2017 nga la iakynduh ia uwei u nongbuaid ha ïew Seiñduli. Uta u nongbuaid u la khublei ia nga bad u la thep 100 tyngka ha ka pla jong nga, u da ong, “Sir sa leit dihsha hi namar nga la kyrkieh.” Paralok, ngeit ne phim ngeit ba lada peit nongpang, ki pastor kim ju ai pisa hynrei ki shu duwai, katba lada leit peit ki nongbuaid pat ki ai pisa. Kumta paralok, you may be right but you are not perfect.

Kino kino kiba bitar ia nga haba nga thoh “Ex.Rev.” ha ki kotkhubor phi lah ban leh ia kawei na kine:(1) leit ujor noh wut wut sha ka synod, (2) leit ujor sha ki pulit ne(3) file da ka case hapoh High Court. Leh noh kham kloi ioh phin iap ha u corona. Namar lada u corona un trei ia phi te ym thikna ho la phin im ne phin iap. Te ia kaei ba phi mut ban leh, leh kloi mynta. Pynhun ia la ka mynsiem lok.