KI DAK JONG KA IA BA KHADDUH

AIS SUJA

Ki dak jong ka ia ba khadduh ki long shibun bad ha sawdong jong ngi kumba ka Bible ka la kren. Ki dak jong ka ia ba khadduh kam dei kaba suk hynrei ki jingjynjar jong u bynriew hangne ha sla pyrthei. Naduh ka por ba u Jisu u dang don hangne ha pyrthei u la dep iathuh ba kin mih ki Khrist lamler (anti Christs) ban shukor ia ki briew, bad ki la don bun mynta ha sawdong ka pyrthei. U ong ba ka kynja bynriew kan ieng ialeh ia ka kynja bynriew, ka hima ia ka hima, kin long ki nem sniew, jingiapthem (khlam), jingkyniuh jumai ha kylleng ki jaka. Mathaios 24:4-7.

Kine kiei kiei ba la thoh ha ka ktien u Blei ki jia mynta bad nangiai jia. Ki jingjia kiba jia mynta ki long tang ki jingsdang jong ki jingjynjar. Mathaios 24:8. Kaba kut kampat jia. Mathaios 24:6. Kawei pat ka dak, kadei ka jingialap ia ka ktien u Blei (Gospel). Lah ban ong ba ka bun bah ka jingialap Gospel ka la jan dep artad lait noh katto katne namar ia ka Gospel ba ialap ha kylleng daki ba bun ki lad ki lynti, khamtam ha kane kajuk jingstad, science ymdon shuh u bym iohsngew ia ka Gospel u khrist lait satang ba ki ialeh pyrshah hi ia ka, la katta ruh ka iaid bad ka roi, namar u Blei u la kren – “ka ktien kaba mih noh na ka shyntur jong nga: kan ymphai suda, hynrei kan pyndep ia kata kaba nga sngewbha, KAN ROI RUH HA KABA NGA LA PHAH IA KA.” Isaiah 54:11.

Sa kawei pat kadei ka dak, shaphang ki Jiw ne Israel, ka ktien u Blei ka ong –“kin kyllon ruh da ka syrti waitlam, yn ialam mraw ia ki sha ki kynja bynriew baroh, kan long ba la iuh top ia ka Jerusalem da ki Jentil, tad ynda la pyndep ia ka ia (age) ki Jentil. Loukas 21:24. Ki Jiw ne Israel ki la dep ban kyllon ha ka syrti waitlam bad la dep ban ialam mraw ia ki sha kylleng ka Pyrthei da ki kynja bynriew Jentil (da kiba bun ki Ri ka Pyrthei) naduh u snem 70 AD. La synshar halor jong ki daki Jentil (kiba bun ki Ri). Hynrei ka ia ki Jentil ka la kut noh haba ki Jiw ne Israel ki la synshar dalade ialade naduh u 1948 AD. Ki Ri Jentil kim don bor shuh mynta namar ki Israel (Jiw) ki la long ha ka bor (super power). Ia kane ruh la pyndep. Sa kawei pat ka dak ka long ka dak jong ka jingkiew ka Jingstad ha ka pyrthei kynthup ia ka Israel. Ka jingkiew ha ka science bad technology. Kane kadei kawei na ki dak ki ia ba khadduh. Ha ka kitab u Daniel la thoh – “Haduh ka por jong kaba kut kein bun kiba phet shane shatai bad ka jingtip kanroi” Many shall run to and fro and knowledge shall be increased. Daniel 12:4.

Ngi im haka ia kaba kiew bha ka jingstad bad ka jingbun kam sharum shaneng ha kaba beh spah bad kiwei ki kam kiba kyrkieh. Kane hi ka long ka dak jong ki ia kaba khadduh. Ngi im ha ki sngi ba ki briew ki ia beh ia ka spah, ka nam ka burom bad ka bor, khlem pyrkhat shuh ia ka ia kaba kut. Ka ktien u Blei ka maham ia kane ka pateng (Generation) kaba ia beh ia ka nam ka burom ka bor bad ka spah pyrthei, namar ki long ki sngi ba khadduh u Blei u ong – wat ai ba u riewstad un sarong ha la ka jingstad, u ba khrawbor un ym sarong ha ka bor , u ba riewspah un ym sarong ha ka spah jong u. Jeremaiah 9:23. Kine baroh ki long kita ki dak jong ka ia kaba khadduh ne ka dak kaba kut jong ki rta (the end of the age) jong kiei kiei kiba ha kane ka pyrthei.

Mynta ngi tip ba ngi im ha ki ia kiba khadduh, ka ladei ka por Ia uwei pa kawei ban phai khmat sha u Blei bad kylla kaba mut ha shwa kata ka jingjynjar bah (great tribulation) kan rung ha ka pyrthei. Mynta hi ka long ka por ban kylla kaba mut, ka lashai kam ju wan (tomorrow never come). “To uta u bymhok un nangleh bymhok: uta uba tngit un nang tngit: uta uba hok to nangleh hok: uta uba khuid to un nang khuid”. Jingpynpaw 22:11. U Jisu u ong – “Ha khmih Nga wan kloi: suk uta uba iai sumar ia ki ktien jong ka jingiathuhlypa jong kane ka KITAB.” Jingpynpaw 22:7. Amen.