“Ki Congress ki thep ia ka pisa paidbah sha pla lajong”

Shillong, 11 Nohprah:
Haba takrain tyngeh ia ka jingkam jong u Myntri Rangbah ka jylla u Dr Mukul Sangma ba ka jingpynduh ia ka pisa T. 1000 bad T. 500 kan pynshlur shuh ban bamsap, u nongaiktien ka BJP u Gopal Krishna Agarwal u la ong, “Ka jingkren jong u Dr Mukul ka dei kaba bakla nadong shadong”.
Haba kren ha kane ka sngi Saitjain ha ka jingwan iuhkjat ha ka nongbah, u Agarwal, u la kynnoh da kaba ong, “Ki Congress ki pyndonkam bakla ia ka pisa jong u paidbah ba la ai da ka sorkar pdeng sha kane ka jylla da kaba thep sha pla lajong”.
Ha kane ka taiew, u Dr Mukul Sangma u la ong ba ka jingpynduh ka sorkar BJP ia ka lut pisa T. 1000 bad T. 500 kan pynkharoi shuh shuh ia ka bamsap ha ka ri da kaba kynthah ruh ba ka dei ka jingleh khlem pyrkhat jong u Myntri Rangbahduh ka ri u Narendra Modi kaba la ktah jur ia kiba duk ba suk.
U nongialam ka BJP u la ther kylla ruh ia ki Congress da kaba ong ba ki pyrshah namar ba ki la ktah jur na kane namar ialade ki bamsap ia ka pisa jong u paidbah ka ri.
“Wat ia ki skhim ba bun jait na ka sorkar pdeng ba la mang sha ki paidbah, la pyndonkam bakla”, la kynnoh u Agarwal.
U la ong ba ki briew baroh ha ka ri, ki la kyntait lut ia ka Congress lait sa tang ha ki katto katne ki jylla kum ka Meghalaya, Mizoram, Karnataka, bad ka daw ka dei namar ki la bamsap bampong.
“Ka bamsap 2G Scam, Commonwealth Game, bad bun kiwei ki kam bamsap kiba la pynjot ia ka ri bad ktah ia uba duk ba suk”, la ong u nongialam ka BJP.
U la ong ba ha u 2018, kyrmen ba ki paidbah ka Meghalaya kin sa ai ia ka jubab kaba biang ia ka Congress ha kane ka jylla. “Ngi kyrmen ba ha u 2018, ki paidbah kin wanrah ia ka jingkylla ban kyntait syndon ia ka Congress”, u la ong.