Ki bym pat dep injek covid, kin nym ioh rung sha Arunachal

Guwahati: Ka sorkar Arunachal Pradesh, ka la rai ban nym shah, ia ki briew ki bym pat dep injek, ba kin rung sha katei ka jylla.

Katei ka rai, ka dei kaba la shim, hadien ka jing iakren da ka video conference, hapdeng U Secretary kam poh iing ka sorkar India, U Ajay Kumar Bhalla ha ryngkat bad ki chief secretary jong ki jylla na ka thain shatei lam mihngi, hynnin ka sngi.

“Ngi pyn thikna, ba kito kiba wan sha ka jylla, ki dei ban shah injek shwa ialade” ong U Naresh Kumar, Chief Secretary ka Arunachal Pradesh.

Haduh hynnin ka sngi, ki don 38,283 ngut kiba ioh pang covid ha ka jylla bad sa 184ngut kiba iap bad sa 36,736 ngut kiba la jem na ka jingpang.
Katei ka jylla, ka la dep ai injek ia 68 percent ki nongshong shnong jongka haduh mynta.