Shillong: Haduh mynta kiba la pyniasoh ia u Aadhaar Number ban ioh khaw reshon ki don tang 49.61 percent ha Meghalaya bad lada kim pyndep ne leh Aadhaar shwa u bnai Jylliew, kin duh khaw reshon.
U myntri ka tnad sam marbam ka jylla u bah Comingone Ymbon, ula ong mynta ka sngi ba kito kiba ioh khaw reshon ki dei ban don Aadhaar noh namar ba ka sorkar India kan ym ai khaw shuh ia ki bym don Aadhaar.
Ula pyntip ba ka sorkar India kala ailad ia ka Meghalaya ba kan pyniasoh Aadhaar lut ia baroh kiba ioh khaw reshon shwa u Jylliew 2025 bad lada ym leh, kin duh bhah.
“Ka sorkar India ka la buh por haduh 30 tarik Jylliew 2025 ba baroh kiba ioh khaw reshon, ki dei ban don u Aadhaar bad lada kito kiba ioh khaw kim leh Aadhaar, ka sorkar India ka lah ban ot noh ia ka bhah ioh khaw ka jylla”, la ong u bah Comingone.
U la ong ba na ki 21 lak ngut, tang 10 lak ngut tam kiba don Aadhaar ban ioh khaw reshon ei na ka sorkar India lyngba ka NFSA bad u myntri u la ong ba um kwah ba ki nongshong shnong kin duh khaw bad ula kyntu ia ki paidbah kiba ioh jingmyntoi na kane skhim khaw ei NFSA, ba kin leh Aadhaar.
U myntri u la ong ba kane ka dei ka jingtynjuh kaba khraw ia ka sorkar jylla bad ula ong ba ha West Khasi bad Eastern West Khasi ka jingdon ki briew ba don Aadhaar ki long 38 percent, Ri-Bhoi 39 percent, ha Shillong 41.31, Baghmara 43.38, Sohra 50.73, Pynursla 51 percent, Tura 53.46, Jowai 43.51, Khliehriat 54.60, Resubelpara 54.37, Amlarem 57.53, Williamnagar 58.20, Ampati 60.12, Dadengere 65.6 percent.
U la ong ba ka daw ba ki briew ki duna ban shon Aadhaar ka long kaba eh ban jubab bad ka sorkar ka dang iakhun tyngeh ban pynsngew ba kin wan shakhmat ban leh Aadhaar. U la ong ba ka sorkar kan iatreilang bad ki bor shnong ban pynthikna ba ki briew kin wan shon Aadhaar.
“Ki paidbah kim dei ban tieng ban sngewthuh bakla ban tieng ia u Aadhaar, nga ruh nga la leh Aadhaar bad la pyniasoh ia ki bank account bad kiwei ki jingdonkam”, la ong u bah Comingone.
Phi don ban ong eiei?