Ki briew na ki thain Umsiang, kiba bynnud ba u Dasakhiat Lamare un leit iakhun noh na Nongkrem

Nongpoh: Ka khubor kaba la saphriang eh ba u Dasakhiatbha Lamare, MLA Mawhati, ba un iehnoh ia ka Mawhati bad ha u snem 2023 un sa leit ban iakhun noh na Nongkrem Constituency, ki la don bun ngut ki riew paidbah kiba dei na katei ka Konstitwensi, ki la pynpaw ba ki bynnud eh ia u, namar u dei u briew uba bha bad uba kloi ban iarap, na bynta kito kiba leit ban pan jingiarap na u.

Ka long ka jingshisha ba kat haduh kine ki sngi, ba u Dasakhiatbha Lamare, um pat la pynbna paidbah ba un mih noh na Mawhati, da kaba un sa leit iakhun noh na Nongkrem ha u 2023, hynrei ki la don pat ki paidbah kiba la iohsngew lyngba ki nongbud jong u, kiba la ong ba u Dasakhiatbha Lamare un sa leit iakhun noh na Nongkrem. Ia kitei ki kyntien bynnud kaba la iohsngew na ki riew paidbah, ki la paw ha ka sngi kaba u Dasakhiatbha Lamare, u la leit ban buh mawnongrim ha shnong Umsiang, ha kaba lyngba katei ka sngi, la ioh ia ka sur na ki riew paidbah, kiba la pynpaw ba ki dang bynnud ia u.

Ki la don ki riew paidbah kiba sah ha ki thain Umsiang, kaba u nongthohkhubor u la ioh ban iakren bad ki, ha kaba ki la pynpaw ba u Dasakhiatbha Lamare, u dei u briew uba trei bad uba lah ban ong ba u la wanrah ruh ia ki kam pynroi hapoh ka Konstitwensi, hynrei namar ba ka dei ka konstitwensi kaba la heh ba iar bad ka Konstitwensi kaba dang sahdien eh, kumta ka shem jingeh ia u ba un pynhun lut ia baroh.

Ki la ong ruh, ba na bynta ki paidbah ha katei ka thain Umsiang, u Dasakhiatbha Lamare, u la trei shitom shisha bad uba la pynioh ia ki kam pynroi kaba la long ka jingmyntoi ia ki paidbah kiba sah ha katei ka thain, ha kaba kawei na ki nuksa ka dei hadien ba u la lah ban pynurlong ia ka surok na Umsiang bad kaba la pyniasoh ia shibun tylli ki shnong sha ki thain Amdubighat bad ki thain Amphreng.

Ki la pynpaw ruh ba kumba ka long mynta, kawei na ki jingshah kren eh u Dasakhiatbha Lamare bad bun ki briew ki la ong ba um shym la leh ei ei, ka dei namar ba kat haduh mynta ba um pat lah ban pynurlong ia ka surok ba donkam tam ha Mawhati, kata ka dei ka surok na Umsning-Sonidan bad haduh Umsiang, ka surok kaba don ia ka jingjrong kumba 80KM bad kaba dei ruh ka surok kaba ki paidbah ka Konstitwensi ki angnud eh.