Ki briew mynta kim nang shuh ban shna synduk metiap, Ong u rangbah, uba shna synduk

Shillong:Ka jingiap jong ki briew ha ka jylla naduh ba la wan lynshop tyngeh ka khlam Covid-19 ha ka ka kynti kaba ar ka la long kaba shyrkhei haduh katta katta ha kaba ym ju don satia kawei ruh ka sngi ban nym don ka jingïap briew bad ka la pynlong ruh ka jingdawa kaba khraw bha ha ka liang jong ki synduk metiap.

Ki nongshna synduk iap briew kiba shna bad buh dukan ha ki thaiñ Upper Shillong ki la pynpaw ia la ka jingeh kaba ki mad ha ki por ba ka jylla ka don hapdeng ka jingshah khangdam namar ka long kaba eh haduh katta katta ban ioh ia ki dieng kiba biang ban shna ia kitei ki synduk katkum ka jingdawa jong ki paidbah bad tang ban leit wad dieng ruh ym ioh satia.

U trai jong katei ka dukan die synduk metiap u la ong ba ha kine ki por ba don kane ka khlam ka la don ka khep ha kaba ki la don ki briew kiba wan ban thied synduk na katei ka dukan hynrei ka long kaba sngewsih haduh katta katta ba ym shym la lah satia ai synduk namar nym don synduk shuh bad u la ong ruh katei ka jingjia kan iai pynsah jingkynmaw sah ia u namar ka synduk metiap ka long kum ka kam iap kam im . U la ong ruh ba u trei ia katei ka kam ym na ka bynta ka pisa hynrei u kwah ban kner lem ka jingiarap sha ki paidbah ha katei ka liang khamtam lei lei ha kine ki por bad ki juk kiba mynta ba ki briew kim nang shuh tang ban shna synduk metiap ruh bad kim don shuh hi ruh tang kita ki misteri dieng ruh mynta. Utei u trai u la ong ruh ba lada ym don shuh sa kitei ki nongshna synduk kiba dang nang dang tbit, ka lah ban poi ruh ka por ba hap ban shu thep ia ki metiap ha ki borni ban leit tep lane ha ki krong kumba leh ki dkhar. Utei u rangbah u la ong ruh ba katba u dang im u iai shna beit ia kitei ki synduk metiap khnang ba ka jaitbynriew bad khamtam ki khristan kin ioh ban leh burom khadduh khadwai ia ki baieid bathoiñ jong ki kiba la leit noh na kane ka sla pyrthei.

Na ka liang jong utei u rangbah u la kyrpad ia ka Sorkar ba kan phai khmat lem sha ki, namar kane ka kam ka dei ka kam ban kyntiew ia ka imlang ka sahlang bad khamtam eh ia ka kolshor jong ki khristan