Ki briew kiba kren ia ka ktien tynrai lajong, ki dei kiba kiew ha ka ioh ka kot, ong U MP

CHENNAI: Ka jingthmu jong ka sorkar India, ban pyndonkam ia ka ktien hindi, ha ki jylla bapher, ka la wan rah ia ka thma ktien, kaba jur ha kine ki sngi bad mynta ka sngi, U TKS Elangovan, uba dei u dkhot jong ka dorbar Rajya Sabbha bad u nongialam ka seng DMK, ula kynthah, da kaba ong ba ka jing pynbor ia ka ktien hindi, kan pynkylla ia ki Tamil, kum ki “Shudras” lane ki jait bapoh bad ula ong ruh ba kito kiba kren hindi, ha ka Ri, ki dei ki riew sahdien, katba kiba kren da ka ktien tynrai lajong, ki dei kiba kiew ha ka ioh ka kot.

“Ka hindi, kan leh aiu ia ngi? Kan pynlong ia ngi ki Shudras. Kan nym pynmyntoi eiei ruh em ia ngi” ula ong shuh shuh.

U Elangovan, ula ong ba kito ki bym kren hindi, kum ha West Bengal, Odisha, Andhra Pradesh, Telangana, Tamil Nadu, Kerala, Karnataka, Maharashtra bad Gujarat, ki dei kiba kiew ne em, ha ka ioh ka kot.

“Balei, nga ong kumta, namar ba ka hindi, kam dei ka ktien kmie jong ki briew ha kitei ki jylla haneng. Ki jylla, kiba dang sahdien, ki dei kiba kren hindi bad kitei ki long ka Madhya Pradesh, Uttar Pradesh, Bihar, Rajasthan bad sa kawei ka jylla, kaba dang shu thaw shen, ka Uttarakhand. Kumta balei, ba ngan kren hindi” ula ong shuh shuh.

U Elangovan, u ong shuh shuh ba ka burom jong ki nong Tamil, ka la don lypa la 2hajar snem bad kane ka dei kaba pyn iaryngkat ia ki briew, khlem da niew ia ki shynrang ne kynthei. “Ki kwah ban pynduh jait ia ka kolshor jongngi, ban pynrung da ka Manu Dharma, lyngba ka Hindi. Ym bit ban shah da lei lei. Lada ngi kohnguh, ngin sa kylla long ki mraw, ki Shudras” ula ong.

Ka jingkren jong U Elangovan, ka nang pynskhem ia ka jingkren jong U K Ponmudy, myntri ka pule puthi, ha kaba ula kynnoh ba ki briew kiba kren hindi, ki dei tang ki nongdie puri ha katei ka jylla bad ba um iahap satia, ba ki ban ioh kam ioh jam, ki dei tang kiba nang ban kren hindi. Utei u myntri, ula ong “Don bun kiba ong, ba phin ioh kam, lada phi nang ban kren hindi. Peit hangne ha Coimbatore, mano ba die pani puri. Ki dei kitei kiba kren hindi” ula ong shuh shuh.