Ki briew ki ieid ia ka UDP, hynrei duna ki MLA ba ki kyrtong ka Party kim don ‘Finishing’ shwa ki sngi thep Vote, ong U Ma Kyrmen Shylla

Nongpoh: Haba ai jingkren hapdeng ki para nongialam ka Party UDP kaba la long hynne ka sngi ha Nongpoh, u Ma Kyrmen Shylla, uba dei u Myntri ka Sorkar jylla na ka Party UDP, u la sngewkhia eh, ba na ki 5 tylli ki Constituency ha Ri Bhoi, hynrei wat tang uwei ruh u kyrtong na ka Party um poi sha ka thong jong ka jingjop ha ka Ilekshon 2013 bad 2018.

Haba iadei bad ka jingbym jop ki kyrtong na ka Party UDP ha kine ki ar-kynti kiba la leit, u Ma Kyrmen Shylla, u la ong ba u kwah ban buh jingkylli sha kito ki kyrtong kiba la ieng na ka Party, ba balei ki kyrtong ka Party ki rem ha kine ki ar-kynti kiba la leit noh, halor kata dalade hi u la ong, ba lehse baroh ki la sngewthuh bad khamtam eh ha kine ki 7 ne 5 sngi shwa ba ki paidbah ki leit thep vote bad ka daw hi kaba ki kyrtong ka Party kim poi sha ka thong, ka dei namar haba kut kim lah ban leh ia kata ka ‘Finishing’ bad kaba pynlong ia ki kyrtong ka Party ba kin liem lyndang lut.

Shuh shuh, u la ong ruh, ba kat sha ki jaka kiba u leit, u ju iohsngew beit ba ki paidbah ki ieid eh ia ka UDP, da kaba ki ong ruh ba ki donkam ia ka Party ba kan ioh ia ka bor synshar hapoh ka jylla. Na ka jingkren u Ma Kyrmen Shylla, la sngewthuh ba uno uno uba long u kyrtong na ka Party, u dei ban biang nadong shadong, khnang ba yn lah pynbiang ha kito ki sngi shwa ban thep vote bad ban poi ruh sha ka thong jong ka jingjop.

U Ma Kyrmen Shylla, u la kyntu ruh ia ki nongialam ka Party UDP ha Ri Bhoi, ba ki dei ban long kiba iatreilang bad ban trei shitom ha ryngkat ka jingkyrshan ki para nongialam Party hapoh ka jylla, khnang ba ki kyrtong kiba ieng na ki Constituency kin poi sha ka thong jong ka jingjop.