Ki briew, ki dei ban long ki nong iada mariang, ong U Pastor

Jowai, 7 Jylliew:
Ka Balang Presbyterian Mynso, West Jaintia Hills District, kala pyn-long ia ki programme bapher bapher kum shi-bynta ha kaba rakhe ia ka Environment Day.
Ha kane ka jingra-khe, ha ka 3 tarik Jylliew 2017, la pynlong ia ka iakob thoh ese, katkum ki kyrdan bapher bapher na ka bynta ki khynnah skul baroh kiba don ha shnong Mynso halor ka subject ka bynta ki samla ban iada ia ka mariang. Ha ka 5 tarik pat la pynlong ia ka Seminar halor ka phang “Ka mariang, ki jingthaw U Blei, sumar ia ka” ha kaba u Rev. Dr. HCT Sumer kum u resource person u la kren shibun kiei kiei kiba ai jingmyntoi shibun eh ia ki nongsngap, kiba kynthup ia ki dkhot ka Balang, ki nonghikai bad ki khynnah skul baroh kiba don ha ka shnong Mynso.
U Pastor haka jingkren jong u, u la ong ba kane ka pyrthei kaba ngi im ngi shong ngi sah, ka dei kawei na ki jingthaw bad ki jingpynlong U Blei (God’s Creations). Haba U Blei u la buh ia u briew ha kane ka pyrthei ka jongthmu jong U ka long ba u briew un sumar ia ka, kaba ngi pule katkum ka Ktien U Blei (Genesis 1 : 26 – 30). U Pastor u la banjur namarkata ba kum ki briew, ka dei ka kamram bad kaba donkam eh ban pynmlien ialade ban long ki nongiada bad nongsumar ia kane ka mariang kaba U Blei u la ai ha ngi.
Ki jingmlien ban bret pynjakhlia sha ki um ki wah, ki surok ki lynti ki syngkieng bad wat sha ki khlaw ki bthap, ka long ka jingmlien ba sniew namar ka pynsniewdur bad suki suki ka pynjot ia ka mariang. Sa kawei pat ka jingmlien kaba sniew jong ngi khamtam sha nongkyndong, ka dei ka jingthang pathar ia ki khlaw ki bthap. Kane ka jingmlien thang khlaw ka kthah shikatdei eh ia kane ka mariang jong ngi, namar u wei u kyndok jingpruid u pynjot da ki lak tynrai ki jingthung, ki kymbat bad ki dieng ki baheh bad barit.
“Namarkata dei ban pynduh ia kane ka jingmlien basniew”, u la ong. Ha kane ka sngi la sam ia ki khusnam sha ki khynnah skul kiba jop haka Essay writing contest. Hadien ka seminar la pynlong ia ka jingthung dieng sawdong ka compound Iingmane bad ha ka jaka ka Balang. Kane ka long ka jingpyllait khubor na u Secretary Balang, u ma H. Dhar.