“Ki bor ka District Council ki la nang shah sliah, kat nang mih ki sngi”

Shillong, 29 Naitung: 
Ki bor jong ka Autonomous District Council (ADC) ki  la nang shah sliah katba nang mih ki sngi bad ka daw tynrai ka dei namar ka politik bad ka jinglong ka riti synshar ka ri.
Ki riew shemphang bapher bapher ki la pynpaw ia ka jingduh bor ki district council ha kane ka jylla katba nang mih sngi namar ka shah khyl liap ha ki ain ka sorkar pdeng bad ka sorkar nalor ka jingtlot jong ki nong ialam MDC.
U Bah Sadon K Blah haba kren ha ka jingiathir jingmut ha kane ka sngi Nyngkong halor ka phang, “Ka bor thaw ain ka Sixth Scheduled jong ka Riti Synshar ka ri India ban iada bad ban pynneh pynsah ia ka hok ki Riti dustur hapoh ka jylla Meghalaya”, u la ong ba ki district council ha kane ka  jylla kim don bor satia namar ba ka don ka Para 12 A ka riti syn shar ka ri.
“Ki ain ki district council ki bret sharud haba wan ka ain jong ka sorkar jylla ne ka sorkar pdeng”, la ong u Bah Blah uba hikai ha Seng Khasi College ha ka subjek Political Science. U la bynrap, “Bun ki ain ba kongsan bha ba la thaw da ki district council ki liem noh tang shu leit ha iing Kashari”, la ong u Bah Blah.
Ha kano kano ka bynta, ka bor jong ka district council ka la tlot lut. U la ong ha ka liang ka jinglong trai ia ka khyndew ka shyiap ruh kam lah ieng. “Kham khlain ka National Green Tribunal (NGT) ban ia ka bor jong ka Sixth Scheduled jong ki District Council”, u la ong.
U la ong ba haduh mynta, ka jaitbynriew ka la shah synshar ha ka Uniform Civil Code kaba jar jar namar ba ym don kawei ruh ka kyndon kaba la bsuh ha ka riti synshar ka ri India ban iada ia ka jaitbynriew da ka Artikil kumba long ki Nagaland, Mizoram namar ba hangne la shu pynap ha ka Scheduled.
“Haba kren kyllum, ka Riti synshar ka ri bad ka politik ka la pyntlot ia ka jaitbynriew jong ngi”, u la ong Bah Blah uba dei ruh u general secretary ka HNYF.
“Ngim dei ban don ha ka Scheduled hynrei dei ban don ha ka Artikil ka Riti synshar”, u la ong biang bad bynrap, “Ka sorkar ka ai kawei ka kti bad ka shim da kawei ia ka kti ia ka bor jong ki district council”.
U la ong ba kum ka jaitbynriew la donkam ban dawa ban don noh ka Personal Law kaban iada ia ka hok jinglong kyrpang kumba don ki Muslim, ki Hindi bad kiwei.
Katba u Bah Erwin K Sutnga uba dei u nongai buit ka MIPRL u la ong ba ka long kaba sngewsih ba la wanrah ia ka District Council ha kane ka jaitbynriew kaba tlot bor.
U la ong ba ka jingtlot ka dei ruh namar ki nongmihkhmat kum ki MDC ha kaba u paidbah hi u jied wat tang ia kiba shu nang ban shon kti ruh.
U Prof AK Nongkynrih na NEHU, u la ong ba kaba kongsan bad donkam mynta ka long ba ka jaitbynriew ka dei ban iathir bha ia ka daw iing lajong ban wad ia ki jingtlot jongka.
Katkum ka jingong u Prof Nongkynrih, ka jingtlot ka jaitbynriew ka mih na la iing bad kane ka la pynioh bor ia kiwei kiba nabar.
                Ia kane ka jingiathit la pynlong da ka Samaritan Action For Social Transformation (SAST) bad la pyniaid ia ka jingiathir da u chairman ka Dorbar ki Khlieh Nongsynshar ka Ri Hynniewtrep u Bah John F Kharshiing bad la wan iashim bynta ki nongsynshar shnong, ki syiem, ki doloi, bad ki riew rangbah.