KI BNIAT

Kong Linda Kongwang

KI BNIAT: Kumno ban sumar hi ha iing na ka bynta ban ioh Ia ki bniat kiba lieh bad khuid.

Ki bniat ki dei ki dkhotmet ba kongsan kiba lah ban pynkylla ia ka jinglong jingman jong ka dur khmat jong phi. Ban ioh ia ki bniat ki bymlieh,kiba lah ban long stem ne bthuh,thikna kine ki lah ban pynsniew ia ka durkhmat jong phi baroh kawei.Na ka daw ka jinglong stem ki bniat phi lehrain ban phuh samrkhie ha khmat ki paralok jong phi bad phi pyrshang shitom ban buhrieh ia ki bniat ba stem jong phi bad lada phi don ia kum kane ka jingsngew,te phi sngewsih ia ki bniat bym lieh jong phi.

Ki lah ban don shibun ki daw kiba pynlong ia ki bniat jong phi ban stem ne jngem.Ka lah ban dei na ka jingbymlah ban sumar bha ia ki bniat,ka jing dih sikret,ka jingdih palat ia u kophi,ka jinghiar pateng,ka jingduna ka protein ha ka met bad kiwei kiwei.Watla ka lah ban dei na kano kano ka daw,ha kaba khatduh ka lah ban pynsngew sih ia phi bad phim kwah ban phuh samrkhie.

Baroh ngi kwah ban ioh ia ki bniat kiba lieh bad khuid itynnad bad bun sien ngi ju leit khnang ban shah sumar ia ki bniat jong ngi ha ka dor kaba rem bad kane ka lah ban ktah ia ka pla tyngka jong ngi.Hynrei lada phim kwah ban pynlut ia ka por bad ka pisa jong phi,phi lah ban pyrshang ia ki katto katne ki jingsumar hi ha iing kiba ym tang ba ki dei kiba suk hynrei ki iarap bha ruh.Te phi lah ban pyrshang ia kine ki jingai jingmut kumno ban sumar hi ha iing na ka bynta ban ioh ia ki bniat kiba lieh bad khuid.

1. KA SNEP KAIT:— Ia ka kait la ju tip ba ka dei kawei na ki natural ingredient kiba don shibun ki nutrients kiba lah ban tei bha ia baroh ki bynta jong ki dkhot met.Hynrei hato phi tip ka snep kait ruh ka dei kaba ai jingmyntoi shibun khamtam ha kaba iadei bad ka jinglieh jong ki bniat.Ki bniat ki lah ban kjit ia ki minerals kum ka potassium bad magnesium kiba don ha ki kait,kine baroh ar kidei ki natural bleaching agent bad dei na kane ka daw kaba pynlong ia ki bniat ban I khuid, i lieh bad pynlongkoit longkhiah bha ia ki.Kyrshut ia ki bniat da ka snep kait kumba ar ne lai minit arsien ha ka shisngi na ka bynta ban ioh ia ki bniat kiba lieh bad phyrnai.
2. PYNDONKAM DA U RNGA :— Ban don ia ki bniat ki bymlieh kiba lah ban long ktieh ne stem,thikna ki lah ban pynsniew ia ka dur ka dar jong phi baroh kawei bad phi pyrshang shitom ban ym phuh samrkhie than ban buhrieh ia ki bniat kiba stem jong phi.Phim dei ban khuslai,phi lah ban pyndonkam da u rnga.U rnga u dei uba bun bha ki antioxidant bad u dei uba lah ban weng ia ki jingsahdak ha ki bniat.
3. STRAWBERRIES :— Kine ki soh ki dei kiba bun bha ki antioxidant ha ki bad ki dei ruh kiba bun ki natural enzyme ia kaba la tip kum ka malic acid kaba iarap ban pynlieh bha ia ki bniat jong phi.Kaei kaba phi lah ban leh ka long shim uwei u straw berry,tylliat ni bha ia u hadien kata phi lah ban tah ha ki bniat jong phi bad kyrshut kumba ar ne lai minit,nangta sa sait khuid ia ki da ka um.
4. U KAJOR :— Ban bam im ia u kajor ka dei kaba ai jingmyntoi shibun ia ka koit ka khiah jong ka met bad ki bniat. Une u jait jhur u lah ban iarap khrut ia ki kynja plaque ne ki jaboh kiba lang bad sahdak ha ki bniat.Ban kyrshut da u kajor ha ki bniat ka lah ban pyniap ia ki khniang jingpang (bacteria)bad ha kajuh ka por kan pyn phyrnai ia ki bad pynioh ia ki bniat kiba longkoit longkhiah bad kham lieh.Kumta jied ia ki kajor kiba shroin, sait khuid bha bad bam im ia ki.
5. KIAR NA KA JINGDIH SIKRET :— Ha man la ki jingthoh ne ki jingpule,phin shem ba bun ki riewwadbniah ki kdew ba u sikret ne biri kim dei kiba bha na ka bynta ka jingkoit jingkhiah jong ka met.Ka jingtan ne dih ia u sikret ka lah ban pynstem ia ki bniat, pynsma ia ka shyntur bad pynioh shibun ki jingpang kiba shyrkhei.Ban lait na kine ki jingeh bad jingshitom baroh,ieh noh shisyndon ia ka jingdih biri ne sikret ban ioh biang ki bniat kiba lieh bad phyrnai bad ban ioh iaka met kaba koit ba khiah.
6. KA MLUH :—Ka mluh ka dei sa kawei pat ka natural ingredient kaba lah ban iarap pynkhuid ia ki jingsahdak ha ki bniat bad weng ia ki jaboh kiba lang ha ki bniat.

KHUBLEI