U bah RM Shabong, Editor Rupang bad U Bah K Tangsang, Sordar Raid Lyngkhat, ha ka jingjurip ia ki jingker sainar shiah sha ka Raid Lyngkhat:Rupang
Shillong:Hadien ka jingioh jingtip, ba U Bah Kentli Tangsang, Sordar ka Raid Lyngkhat, ula tih pynbha biang ia ka madan Lyngkhat, kumta u nongthoh khubor jong u Rupang, ula leit jurip, ia katei ka ma dan, ha ka Sngi Saitjain ba ladep.
Ha ka jingleit, ba la synran, da u Bah Tangsang, la lap, ba ka madan, ialehkai, ka la sdang madan, ha kaba la pynlur, da ki puh shilum, la ar sien kynthih bad ha ka jingiakren, U Sordar, u ong “Ka jingangnud jongnga, ka long, ban pynlong biang ia ka jingialehkai phutbol, ha kane ka madan, kaba donnam” bad u iathuh, ba kan shim por, ban lur, sa ar lane laisen, ia katei ka madan, ba kan long ka madan kaba bit ban ialehkai.
Ka madan Lyng khat, ka dei ka madan, kaba donnam bha, ha ka thain Riwar Mihngi hi baroh kawei, ha kaba la ju pynlong ia ki jingialehkai kiba heh ha katei ka thain, la jan man la u snem.
Ha ka jingleit jurip, la lap, ia u sainar shiah, uba kiew pyn ieng beit sha ki bri ki bsah jong ki trai jaka Khasi, ha kaba la antad, ba ka jingshim jaka, kam dei shuh, tang 150 yard, hynrei, ka lah ban poi sha ka 200 haduh 250 yard ruh, ha ki bynta bynta; katba sha shiliang jong u sainar, ki dieng kwai bad ki jingthung jingtep, ki la jah lut, ha kaba U Sordar, u iathuh, ba ki la pom lut ki khar Bangladesh bad ha ka jingleit jong u nongthoh khubor, la iohi ruh, ba ki shipai BSF, kim don shuh sha shiliang jong u sainar bad kumta katei ka pyni shai, ba ki jaka kiba hap shabar jong u sainar shiah, ba ki la kam trai lut ki khar Bangladesh.
Sa kawei kaba isangsot shibun, ka long ba ka surok khappud lem bad u sainar, ba kan iaid noh na shakhlieh jong ka shnong Lyngkhong bad katei ka pyni shai, ba lada kam don kano kano ka jingkylla, da kumwei pat, kumta ka shnong Lyngkhong, kan hap noh shabar jong u sainar shiah, lane sha u pud jong ka Bangladesh.
Ha ka jingiakren jong u Rupang bad U Sordar, u da kren shai, da kaba ong “Katei ka madan ialehkai phutbol, ka hap ha Ri India bad kumta ngi shna pynbha biang ia ka” bad U Sordar, u iathuh biang, ba ha ka por, ba u leit ban shimti ia katei ka madan ialehkai, ki wan pynsangeh noh ki shipai BDR bad u ong “Ki BDR, ki phah pynsangeh, hynrei ngim sangeh satia, namar ba ka hap ha ka jaka jongngi, kumta ngim sangeh bad ngi phah lur beit bad ngim ailad satia”.
Haba kren halor ka jingker sainar shiah, kaba la bam jaka haduh kumba 7 kilometre shiteng, ha shi lynter ka Raid Lyngkhat, kumta u Sordar, u iathuh ba u sngew pangmet, ban duh noh ia katei ka jaka bad kumta, ula pynsngew, da kaba ong “Katba don ka lad ngin iakhih beit, kumno ban wan rah biang. Nga kwah ban pynbeit biang ia kane, namar ka leit sha Bangladesh, namar ba U Sordar ba mynshwa u ailad” ong U bah Tangsang.
Phi don ban ong eiei?