Ki aktor ha ka politiks

Bah RM Shabong

Ha kane ka elekshon MP 2019, ki la nang mih bun ki aktor, kiba rung sha ka lympung politiks bad ngim tip na kano ka daw, ba ki ia mih bun ki aktor, hynrei, kawei na ki daw, ka long ba ki aktor, la imat, kumba kim ju kham rem elekshon satia.
Ki don ki aktor kiba la don lypa mynta ha ka politiks bad kitei ki kynthup ia U Shatrughan Sinha, ka Hema Malini, ka Jaya Bacchan bad sa shibun kiwei bad mynta, la iohi ba sa ka Jaya Prada, ka la wan sha ka lympung sain pyrthei bad nangta sa U Sunny Deol nalor kiwei pat ki bym da ia tip bha.
Ka sobjek hangne, ka long, la u paidlang ka India, u donkam ia ki riew shemphang, ba kin leit sha ka politiks lane u donkam ia ki aktor lane ki heh spah ba kin rung sha Parliament bad halor kane ngi kynmaw ba U Arun Jaitley, u myntri pla pisa ka sorkar India, ula ialeh elekshon ha u snem 2014, hynrei um shym la jop satia bad nangta ngi kynmaw ba sa uwei u snar jong ka Congress, U PC Chi dambaram, ula shah rem ialade ha ka elekshon 2014 bad ha kane ka kynti, um shym mih pyrthei shuh.
Ym dei tang katta, ki don shuh sa kiwei pat ki myntri jong ka sorkar India, ki bym shym la ialeh elekshon bad kitei ki kynthup ia ka Nirmala Sitharaman, kaba dei ka myntri iada ri bad sa shibun kiwei pat, kiba lah ban shim ba ki dei ki riew shemphang lane ki khraw jabieng, hynrei ki bym nud ne ki bym kwah ban iakhun elekshon, namar shibun ki daw.
Na kiei kiba paw, ngi iohi ba ki don ki khlur ak phlim, lada dei U Shatrughan Sinha, lada dei ka Rekha, lane ka Jaya Bachchan bad la iohi, ba kitei kim shym la shim bynta bha satia ha ki jingkren jongki ha Parliament bad haba ka long kumta, ka pyni ba u paidlang ka India lane lehse wat ki para MLA, haba ki jied ia ki dkhot sha Rajya Sabbha, kim shym la jied satia da ka jingmut ba kin ai jing myntoi ban kren bha halor ki mat ba kongsan kum ki dkhot.
Ha kane ka kynti, ngim shym la iohi ia ki riew said ain kiba thymmai ba kin ia khun elekshon, ki doktor kiba pawnam bad wat ki nongthoh khubor kiba paw jong ka Ri, ba kin mih ban iakhun elekshon bad katei ka pyni shai ba ka India, ha kine ki sngi, kumba ka kwah tang ia ki aktor, ki riew niam bad nangta sa ki heh spah bad lada ka long kumta, ka pyni, ba ka don ka jingma ba ka Parliament, kan kylla long ka jaka shongthait lane ka jaka ialeh biria bad shna pisa da ki dkhot ki bym shemphang.