Ki 70ngut ki don ia ki kot ki sla kiba biang, ong ki pulit na Byrnihat, ka jingleh jong ka CORP ka la bakla

Nongpoh: Ki Pulit ka tnat Anti Infiltration Check Gate ha Byrnihat, kiba don ha Byrnhat, mynta ka sngi ki la pynshai paidbah, halor kaei kaba ki la shah kynnoh ha ki ki dkhot ka CORP, kiba la kynnoh ia kitei ki Pulit ba kim shem la shimkhia ha ka ban talasi bha ia ki kot ki sla ia ki briew kiba wan na kiwei ki jylla bad kiba thmu ban rung sha Meghalaya.

Lah ruh ban kdew hangne, ba hynnin ka step ki dkhot ka CORP, ki la kam ba ki pynher krad haduh 70 ngut ki bar jylla kiba la shong ha ki 2 tylli ki Bus na Assam, ha kaba ki la kam ruh ba ki la leit ban buh ia kitei ki 70 ngut shaduh Khanapara bad kiba la maham ruh ba kim dei ban wan biang sha Meghalaya.

Haba iadei bad katei ka jingpynher krad da ka CORP ia kitei ki 70 ki bar jylla bad kiba la don kumba 70 ngut ei ei, ha kaba ki la ong ruh ba ka daw kaba la pynlong ia kitei ki dkhot ka CORP ban beh ia kitei ki briew, ka dei hadien ba ki la lap ba kitei ki 70 ngut kim shem la don ia ki kot ki sla kiba biang.
Haba pynshai halor katei ka jingshah kynnoh, u Bah I. Iawphniaw, u ophisar Pulit ba deipeit ha katei ka jaka, u la ong ba kitei ka jingleh da ki dkhot ka CORP ka la bakla, namar lada ki lap ba kitei ki 70 ngut kim don ia ki kot ki sla kiba biang, ki la dei ban pyntip sha ki Pulit jong ka Infiltration Check Gate, hynrei ki la shu lehdonbor bad beh jubor ia kitei ki 70 ngut, khlem da tip ia ki jingshisha baroh.
Haba batai bniah halor kitei ki 70 ngut, u Bah I. Iawphniaw, u la ong ba na ka liang ki Pulit kiba don ha katei ka jaka, ki la dep ban talasi bad ki la lap ruh ba baroh kitei ki 70 ngut ki don ia ki kot ki sla kiba biang, lait noh tang ia ki khynnah rit namar kiba la wan ban pyni da ki Birth Certificate.
Shuh shuh, u la ong ruh, ba jin lada kitei ki dkhot ka CORP ki wan ban pyntip sha ki Pulit hapoh ka jaka talasi Mynder ha Byrnihat kan dab ha shibun eh, hynrei kaei kaba ki leh ka long ba ki la iaid lyndet na ki bor Pulit jong katei ka jaka, da kaba ki beh jubor bad beh krad sha ka jaka kaba ki wan.
“Ha ka jingshisha kum ki pulit kiba ap pahara ha katei ka jaka, ngi trei shitom bad pyrkhing bha ia ka rukom rung ki nongwei kiba wan shapoh ka jylla, hynrei watla katta ia kiba pynbiang ia ki kot ki sla, ngi hap ban ailad ban rung laitnoh tang ia kiti ki bym biang ia ki kot ki sla, ngi hap ban pynphai biang sha ka jaka kaba ki wan” ong u Bah I. Iawphniaw.