“Ki 45 sngi ha ka kitab u Daniel”

AIS Suja

Ki 45 sngi ha ka kitab u Daniel: Kane kan jia haden ka thma Armageddon, ka jingpynbna ban theh noh ia ka pliang kaba Hynniew (7). Jingpynpaw 16:17-21. Ki 45 sngi ki long kita ki 1335 sngi kein ba la ong da u Daniel: “Suk uta uba iai ap bad uba kot haduh 1335 sngi” Daniel 12:12. Ban kham shai kane ka bynta, ngin leh kumne: 1260 +30 sngi + 45 sngi = 1335 sngi. kumta ki 45 sngi ki hap hapoh ka por jong ki 1335 sngi kein kiba long ka por jingpynkhreh ia ki 1000 snem ka por jingsynshar u Jisu Khrist ia kane ka pyrthei.

Hapoh kine ki 45 sngi, kaba nyngkong ka long ban tei ia ka Lum Seion. Balei yn tei pat ia u Lum Seion? Ka daw ka long ba ki lum baroh ha Jerusalem namar ki la kyllon lut na ka daw u jumai bah mynba la theh noh ia ka pliang ba Hynniew (7) Jingpynoaw 16: 19-20. Kaba mut yn don u jumai bah bakhraw ha ri Israel. “Te kan long ba ha ki sngi bakhadduh, ba yn pynskhem ia u LUM KA IING U TRAI HA KLIAR KI LUM BAH, bad yn pynkyntiew halor ki lum rit bad ka jaidbynriew baroh kin tuid sha ka” Isaiah 2:2.
Hapoh kata ka por, ia ka ri (Israel) yn pnkylla kum ka madan naduh Geba haduh Rimmon shaphang shathie ka Jerusalem, bad yn pynkyntiew ia ka Jerusalem bad kan shong ha la ka jaka, naduh ka khyrdop u Benjamin haduh ka khyrdop kaba Nyngkong, hadu ka khyrdop Dong (Dong gate) bad naduh ka kut u Hannil haduh ka jingtylliat wain u Syiem. Bad ki briew kin shong ha ka, bad kan ym don shuh ka jingtim; hynrei ka Jerusalem kan shongsuk skhem” Sekharaiah 14:10-11.

“Hynrei ha ki sngi kiba khadduh kan long ba u Lum ka iing u Trai (Lum Seion) yn pynskhem halor ka khlieh ki lum bad yn pynkyntiew ia ka halor ka khlieh ki lum rit; bad ki paidbah kin tuid noh ha u” Mikah 4:1. “Naba ha u lum Bakhuid jong Nga ha u lum ka jingjrong u Israel, ong u Trai u Blei, Hangta ka iing Israel baroh baroh kein kin ia shakri ia Nga ha ki ri, hangta Ngan pdiang ia ki bad hangta Ngan pan ki jingainguh jong phi bad ia ki soh nyngkong na ki jingainguh jong phi lem bad kiei kiei kiba khuid jong phi” Esekial 20:40. Hangne la dep ban tei pat ia u Lum Seion. Mynta yn tei pat ia ka temple u Trai (lah ban ong ba ka dei ka Temple kaba saw).

Ka jingtei ia ka Temple u Trai: “Bad u la ong ha Nga ko khun u briew kane ka long ka jaka ka khet jong Nga, bad ka jaka ki pohjat ki kjat jong Nga, ha kaba Ngan shong hapdeng ki khun Israel junom: bad ka iing Israel kan ym pyntngit shuh ia ka KYRTENG jong Nga ka kyrteng Bakhuid jong Nga, lymne ma ki, lymne ki Syiem jong ki, bad da ki met iap ki syiem jong ki ha ki jaka bajrong jong ki” Esekial 43:7.
“Kumne u kren u Trai ki paid u da ong ha khmih uta u briew uba kyrteng u TNAT bad u mih lung na la ka jaka BAD UN TEI IA KA TEMPLE U TRAI. Un tei ma u kein ia ka TEMPLE U TRAI BAD UN SYNSHAR HALOR KA KHET, BAD UN LONG U LYNGDOH HALOR KA KHET, bad ka jingpyrkhat ka jingsuk, kan long hapdeng jong ki” Sekharaiah 6:13. Mynta la dep ban tei ia ka Temple u Trai, bad yn wallam ia ki Israel baroh SHA U LUM SEION.

Mynta haba la dep ban tei ia ka Temple u Trai, la lum ia ki Israel ban wallam ia ki sha u Lum Seion: “To sngew ia ka ktien u Trai ko phi ki jaidbynriew, ban pynpaw ia ka ha ki dewlynnong kiba jngai, bad to ong – uta uba la pynsakma ia u Israel, un lum pat ia u, bad un sumar ia u, kumba u nongap langbrot u leh ia la ka kynhun. Naba u Trai u la siewspah ia u Jakob bad u la pyllait ia u Israel na ki kti jong uta uba kham khlain (kaba mut u Mradkhlaw ne 666). Bad kin ia wan rwai ha u Lum Seion bad kin ia tuid lang sha ka umphniang bad ha ki khun blang bad ha ki khun masi, bad ka mynsiem jong ki kan long kum ka kper ba la ai um, bad kin yn ia sngewsih shuh lano lano ruh” Jeremaiah 31:10-12.

“Te ha kata ka sngi, ita I bynta ba dang sah jong u Israel bad ita iba ioh lait im jong ka iing u Jakob, kin ym shaniah shuh ha uta uba la shoh ia ki (u Mradkhlaw ne 666) ; hynrei kin shaniah ha u Trai , uta u Bakhuid jong ki Israel ha kaba shisha. I bynta ba dang sah in phai pat I bynta ba dang sah u Jakob kein sha u Blei ba donbor. Namar la u paidlang jong me u Israel u long kum u shyiap ka duriaw, tang ia ita I bynta ba d ang sah na ki, in phai pat; ia ka jingpynduh la thmu lypa, kaba shlei da ka hok…….” Isaiah 10:20-22
Ha kata ka por kein, “Uta uba la thaw ia me ko Jakob, bad uta uba la thaw dur ia me, ko Israel: Wat sheptieng namar Nga la siewspah ia me, Nga la khot ia me da ka kyrteng, me long u jong Nga… Wat sheptieng naba Nga long lem bad me, Nga ngan wallam noh ia u symbai jong me na mihngi, bad Ngan lum ia me na sepngi; Ngan ong ha ka shatei, To ai noh. Bad ha ka shathie, wat bat noh. To wallam ia ki khun shynrang jong Nga na jngai, bad ia ki khun kynthei jong Nga na kaba kut ka pyrthei” Isaiah 43:1-7. “Te kiba la siewspah u Trai kin phai bad kin wan da kaba rwai sha Seion (Zion) bad ka jingkmen kaba jiwnom kan long ha ki khlieh jong ki, kin ioh ka jingsngewbha bad ka jingkmen. TE KA JINGSNGEWSIH BAD KA JINGUD KAN PHET NOH” Isaiah 51:11.

Hadien ka jingwallam ia ki Israel sha Lum Seion kan don pat ka jingwallam ia ki kynja bynriew (Nations) sha ka jingbishar ia ki (angbrot bad ia ki blang). Mathaios 25: 31-45. “Ha kata ka sngi, u Israel un long uba LAI lem bad ki Egypt lem bad ki Assyria, ka jingkyrkhu hapdeng ka ri, naba u Trai ki paid u la kyrkhu ia ki, u da ong – Long ba la kytkhu ia ka Egypt u paidlang jong Nga, bad ka Assyria ka jingtrei ki kti jong Nga” Isaiah 19:24-25 / 56:6-8.
Ka kam kaba khadduh eh ban pyndep hapoh kita ki 45 sngi (1335sngi) ka dei ban pynsleh ia u Jisu ba un synshar 1000 snem. U Daniel u ong “BAN PYNSLEH IA UBA KHUID TAM EH” Daniel 9:24. Tang shu dep pynsleh bad pynphong pansngiat Syiem, u Jisu un synshar noh 1000 snem kein.

U Daniel u ong – Nga la iohi ha ki jing ithuh paw mynmiet, ha khmih u la wan uwei da ki LYOH bneng kum u khun u briew (u Jisu) bad u la wan sha uta uba na mynhyndai kulong (u Blei) bad ki la wallam ia u hajan jong u. BAD LA AI HA KA JINGSYNSHAR BAD KA BUROM BAD KA HIMA ba ki kynja bynriew baroh ki jaidbynriew bad ki ktien, kin shakri ia u. KA JINGSYNSHAR JONG U, KAN LONG KA JINGSYNSHAR BYMJUKUT KA BAN YM DUH NOH, BAD KA HIMA JONG U KA BAN YN PYNJOT NOH IA KA” Daniel 7:11-14.
“Te ha ki SNGI KITA KI SYIEM U BLEI ka Bneng yn pynieng ia ka Hima ia kaba yn ym pynduh lano lano, lymne yn ym iehnoh ia ka jingsynshar jong ka ha kawei pat ka jadbynriew. Hynrei kan pynlwet bad kan bam duh ia kine ki hima (Kingdoms) baroh bad kan iai sah bymjukut” Daniel 2:44 ……. “un synshar halor ka ing u Jakob ha la ka rta: Bad ka hima jong u ruh ka ban ym kut shuh” Loukas 1:30-33.
Hadien ki 45 sngi (1335 sngi), Daniel 12:12 u Jisu un synshar 1000 snem hangne ha pyrthei, “Namar ka dei ia u BAN SYNSHAR tad ynda u la pyndem ia ki nongshun jong u baroh hapoh ki kjat jong u. KA NONGSHUN KABA KHADDUH IA KABA YN SA PYNDUH, KA LONG KA JINGIAP” 1 Korinth 15: 25-26.
“……. Yn lum lang ia kiei kiei baroh ha u Khrist, ia kiei kiei ruh kiba ha ki bneng, bad ia kiei kiei ruh kiba ha ka khyndew” Ephesos 1:8-10. Amen.