Ki 4 ngut ki MDC ki dei kiba biej skhim biej shuki, ong u Bah Bindo

Shillong, 20 Iaiong:
U Senior Working President ka United Democratic Party (UDP), u Bah Bindo Mathew Lanong u la byrthen tyngeh ia ki 4 ngut ki MDC ka party kiba leit kyrshan ia ka kynhun synshar ha Khasi Hills Autonomous District Council (KHADC) ka People Democratic Forum (PDF) hapoh ka jingialam u Bah Pynshngain N Syiem kum u Chief Executive Member (CEM), wat haba ka CEC jong ka party ka la bthah ïa ki ban weng noh ka jingkyrshan hadien ka jinglap jong ka House Committee ïa ka jyrsieh bamsap ha ka EC ba la ïalam da u Bah PN Syiem.
U Bah Bindo u la buh jingkylli ba kumno kitei ki saw ngut ki MDC ki dang kwah ban pynïasoh bad ka PDF, kynthup ïa u dkhot jong ka House Committee, u ba long ruh u PP leader jong ka party ha KHADC, u Bah Teiñwel Dkhar u ba la soi lang ruh ïa ka report jong ka House Committee.
Hynnin ka sngi saw ngut ki MDC ka UDP kynthup u Bah Teinwel Dkhar, u Bah Donkupar Sumer, u Bah Equator Nongrang, bad u Bah Albinus Lyngdoh ki la ialeh pyrshah ia ka party da kaba leit kyrshan ia ka Executive Committee ka PDF ba ialam da u Bah Pynshngain N Syiem, watla ka CEC ka la dep rai ban weng noh bad bthah ia ki ban kohnguh ia ka party. Tang ka Kong Rona Khymdeit bad u bah HS Shylla kiba kohnguh ia ka party ban weng noh ia ka jingkyrshan na ka PDF.
“Ngi don ïa ki kyndon pyrshah ïa ki ba pynkheiñ aiñ bad ïa kito ki briew kiba ïaleh pyrshah ïa ka party bad hapoh kita ki kyndon ka party ka sa pynshitom ïa kine ki 4 ngut ki MDC, kine ki saw ngut kin sa kynduh ia ka lawei kaba dum lada kim kylla ba mut noh ban pyndem ha ka party bad ka jingialeh pyrshah jong ki ia ka rai jong ka Central Executive Committee(CEC) ka paw ba ki dei kiba biej skhim bad kiba biej shuki “, ong u Bah Bindo.
U Nongïalam ka UDP u la ong, “Ka party kan pan jingpynshai na kine ki 4 ngut ki MDC halor ka jingïaleh pyrshah ïa ka rai jong ka party bad lada kim lah ban pynshai ne kylla ba mut ka party kan ai jingsneng da kaba weng noh syndon na ka party”.
Haba jubab ïa ka jingpynpaw jong ki 4 ngut ki MDC ba ha ki snem kiba la dep na ka liang jong u Bah Bindo u la kyntait kumjuh ïa ka jingbthah jong ka party ban weng na ka jingkyrshan ïa u Bah HS Shylla, u Working President ka UDP u la kyntait ba kadei ka jingshisha, bad ong ba kam shym la don satia kum kata ka jingjia.
“Lada ki kwah scheme ne kwah shuki na u Bah Pynshngaiñ kim dei ban ai daw bad ki daw jong ki ruh kiba shu thok bad lamler suda, lada ki kwah ban ïakynduh nga long u ba kloi ban ïakynduh bad kine ki 4 ngut bad ïatai halor kane”, bynrap u Bah Bindo.
Haba kynthoh halor ka jingong jong u Bah Pynshngaiñ ba ka 10th Schedule jong ka Riti Synshar ka Ri kam lah treikam ha ki District Council, kumjuh ruh ka rai jong ki Political Party pyrshah ïa ki MDC, na ka liang u Bah Bindo u la ong, ” Nga kwah ban ïakynduh bad u Bah PN Syiem bad um tip ei ei halor kane ka bynta, u dei u briew u bym tip satia ïa ki rule ki aiñ”.