Ki 30 sngi ha ka Kitab u Daniel

AIS SUJA

Ki 30 sngi ha ka kitab u Daniel. Ban ioh ia ki 1290 sngi, Daniel 12:11, dei ban don ki 30 sngi. Ban kham shai halor kane ka bynta, to ngin ia peit – katkum ka Bible Calender, don tang 30 sngi shi bnai. Kumta 30 sngi x 12 bnai = 360 sngi. Namar kata, 3 snem x 360 sngi = 1080 sngi. Ka shiteng ½ snem = 180 sngi haba khein lang ia ki 1080 sngi + 180 sngi = 1260 sngi ne 42 bnai. Ki 1260 sngi ne 42 bnai ki long ki por ba u soitan un synshar na ka Temple kaba Lai na Jerusalem, ia kaba u Daniel u la ong – “Kaba shiteng jong kata ka Taiew” ka thew ia ki 1260 sngi ne 42 bnai. Daniel 9:27. Nangta pat u ong – “Bad naduh ka por ba yn sa shim noh ia kata ka jingainguh thang (sacrifices) kaba borabor bad ba yn pynieng ia kata ka jingijli ba pynjot (ka thew ia u Mradkhlaw) kan long shi hajar arspah khyndaiphew sngi (1290 sngi), Daniel 12:11. Kumta ngi iakren hangne ia ka jinglong ki 30 sngi ha ki 1260 sngi ban long 1290 sngi katkum u Daniel 12:11.

Kine ki 30 sngi ki wanrung hadien ki 1260 sngi bad ki don ki kam kiba khraw ba u Blei un pyndep hapoh ka por kine ki 30 sngi, bad ki dang hap ruh hapoh ka por ba u soitan Lucifer u dang treikam, namar ka dang ieng hi ka Jingijli Bapynjot. Kumta hapoh kine ki 30 sngi jong ki 1290 sngi kan don ka jingpyniap ia ki sakhi (witness). Jingpynpaw 11:7-10. Nangta u Jisu, un leit sha Edom. Isaiah 63:1-6 / Daniel11:41 / Rome 11:26.
Nangta kan don ka jingiaid paidbah na Edom sha Jerusalem. Hosia 6:1 / Hosia 10:11 / Isaiah 11:16. Nangta kan don ka jingiam briew ba khraw ha Jerusalem. Sekharaiah 12:10-13. Ki sakhi ba la shah pyniap kin im biang. Jingpynpaw 11:11-13. Nangta ka jingkhawai ka IngTrep ha u Lum Seion. Jingpynpaw 14:1-5. Lebitekos 23:34. Nangta ka jingbuhrieh ia ki Israel ha u Lum Olive namar ka dang dei ka por synshar u Mradkhlaw Sekharaiah 14:4-5 / Isaiah 26:20-21. Exodus 14:21-24.

Wat sngew phylla. Kine kiei kiei ki jia hadien ka jingmihpat bad jingrong noh. Katba ha pyrthei dang don tang ki jingkulmar kan don pat ka jingiathoh shongkurim u khun langbrot u Blei ha bneng. Jingpynpaw 19:5-6. Ephesos 5:35-32. Katba u khun langbrot u dang iathoh shongkurim (kaba mut kiba im kiba iap u Jisu u kynduh ia ki ha suin bneng), kan don pat ka jingbitar kaba khraw jong u Blei. Kan long ruh ka jingbitar bakhadduh, ha kaba u Blei un theh ka jingbitar jong ka jingpynkordit da ki tohjaw ia kito kiba mane ia u Mradkhlaw, Jingpynpaw 16:2. Yn pynkylla snam ia ki wah ki duriaw. Jingpynpaw 16:3. Ki briew ki iadih um da ka snam. Jingpynpaw 16:4-7. Yn pynkordit ia ki briew da ka jingthang tyrha jong ka sngi.

Jingpynpaw 16:10-11. U Blei un theh ia ka jingbitar halor ka khet u Mradkhlaw. Kumta kein te ki la dait ia la ki thylliej namar kata ka jingkordit. jIngpynpaw 16:10-11. Ha kata ka por yn pynrngnad ia ka wahbah ka wah Euphrates (haduh ban da rngat khoit). “Uta uba Hynriew u la theh noh ia ka pliang jong u halor kata ka wah bakhraw, ka Euphrates te ka um ka la rngad noh ba yn ioh pynkhreh lynti ia ki syiem kiba na Mihngi” Jingpynpaw 16:10-12. Haba ka Euphrates ka la rngad noh, ki syiem ba na Mihngi ki kynthup ia ki Russia, China, Turkey bad ki ri Arab baroh, kin ialeh thma pyrshah ia ka Israel. Bad kata ka thma kan long ka thma Armageddon, hapdeng u Blei, u briew bad u soitan.

Te ki la ialum lang ia ki sha kata ka jaka ia kaba la khot ARMAGEDDON. Tang shu dep ialeh thma , ka ktien bajam ka wan mih na kata ka Temple, na ka khet, kada ong – LA PYNDEP. Jingpynpaw 16:12-16, 17:14-19. Kaba kut kapor ka jingsynshar u Mradkhlaw, u Blei u pynbna da kaba ong – LA PYNDEP: Jingpynpaw 16:17. Kiei kiei baroh hapdeng u Mradkhlaw bad u briew la pyndep hangne kein, hapoh jong kine ki 30 sngi ba la ong ki 1290 sngi. Daniel 12:11.
Kumta to ngin tip ba ka por jong ki 1260 sngi + 30 sngi, ki hap hapoh ka por ka jingsynshar u soitan Lucifer ia kane ka pyrthei da kaba u leh ialade kum u blei u da shong ha ka Temple kaba Lai sha Jerusalem. Ka por ki 1290 sngi kein ia kaba u Daniel u la ong. Daniel 12:11.

Hadien kine kiei kiei, u soitan um don bynta shuh bad u Blei ne bad u briew, namar u la hun ba u la pyndep la ka pali long blei jong u hapoh kine ki 1290 sngi ba u Blei u la shah ia u namar ka jingkwah long blei jong u kaba la slem bah, ia kaba u Isaiah u la iathuh ba u soitan Lucifer u ong – Ngan kiew sha bneng, Ngan kyntiew la ka khet, Ngan shong halor u Lum jingiaseng, Ngan kiew sha lyndet ki lyoh, Ngan long uba hajrong tam (Most High)” Isaiah 14:13-14.
Kumta u soitan Lucifer u la ioh kein ban pyndep ia ki jingkwah jong u ha kito ki 1290 sngi. Daniel 12:11 bad tang katta hi ka la kut ia u, junom. Kaba khadduh ka long ba yn bret ia u sha ka pung ka ding. Jingpynpaw 20:10.