“Ki 1875 tylli ki snem!”

AIS Suja

Ki 1875 tylli ki snem, ki dei ki snem jingpynshitom pynkordit ia ki khun Israel namar ki la kyntait ia ka jingshisha, bad ki la sahnarphna ia u Messiah jong ki. Dei na kata ka daw ka ong ka ktien u Blei – “Namar ba me la kyntait ia ka jingtip, Nga ruh ngan kyntait ia me, ba men ym long lyngdoh satia ha nga: Naba me la klet ia ka hukum u Blei jong me, nga ruh ngan klet ia ki khun jong me (Khun Israel)” Hosia 4:6.

Ki Israel ki la kyntait ia ka jingtip, ia ka jingshisha bad kim ithuh wat ia la u Messiah. Dei na kata ka daw u Blei u la kyntait noh ia ki bad kim ioh shuh ban long lyngdoh ha u Khrist haduh kine ki sngi naba ki la klet ia ka hukum u Blei. La pynjot thiaw ia ki naduh u snem 70 A.D – 1945 AD. Kaba mut 1875 tylli ki snem ki Israel ki la sakma tang na ka daw ka jingkyntait ia ka jingtip bad jingshisha ka ktien u Blei. Hapoh u snem 70 AD, la pynjot thiaw ia ka Temple da ki shipai Roman hapoh ka jingialam u Titus, ha shuwa bad hapdeng u snem 1945 AD la pyniap haduh Hynniew Million ngut ki Israel da u Syiem Adolf Hitler.

Ia kine kiei kiei la iathuhlypa da u Daniel ……. bad ki briew jong uta u syiem u ban wan (Titus Patsha Roman) kin pynjot ia kata ka Nongbah (Jerusalem) bad ia kata ka jaka kyntang (Ka Temple Jerusalem)”. Daniel 9:26. La pyndep ia ka jingthoh hangne. Bad ki snem ki iaid 1875 tylli da kaba pyndep ne pynkut ia kita ki por jingpynkordit sat ia ki Israel da u Blei ha u snem 1945 AD.

Ki por jynjar ki la kut na ka bynta ki Israel. Namar la dep pynkut haba la dap 1875 tylli ki snem. Ia kane ka bynta, u Blei u la kren lypa da kab ong – “Namar ha khmih ki sngi ki wan, ong u Trai, ba Ngan pynphai pat ia ka jinglong mraw u paidlang jong nga, Ki Israel bad ki Judah ong u Trai: Bad ngan pynphai pat ia ki sha ka Ri kaba nga la ai ha ki kpa jong ki (Kata hadien 1875 snem) bad kin ioh ia ka” Jeremaiah 30:3.

U Blei u kren te ka la long kumta. U Blei u la ai pat ha ki Israel ia la ka jong ka Ri, wat hadien 1875 tylli ki snem. Kumta ha ka 14 tarik May 1948 AD la pynbna da ka UNO, ia ka jingioh pat ki Israel ban pynphai sha ka Ri ki kpa tymmen jong ki (ha Israel)”. Deuteronomi 28:1-5. Hato ka UNO ka tip ia kane? Em hynrei dei u Blei uba trei ia kine kiei kiei hapoh ka dorbar bah UNO, ban shah ia ki Israel ne ka jaidbynriew Jiw ban ioh pat ia la ka Ri. U Blei u la pyndep ia la ka kular halor kane ka bynta, namar u, u dei u Blei um dei u briew ba un lamler. Jingkhein 23:19. U Blei um klet, wat la ka long ka por kaba slem 1875 tylli ki snem. U ong – “Ngan trei. Uei ban khang?” Isaiah 43:10-13.

Jia aiu? Haba ki Israel ki la ioh biang ia la ka Ri kynti ki kpa tymmen jong ki hyndai, haba la pynbna da ka UNO ha u snem 1948 A.D, ki Jiw ne Israel ki la nangiabun ki la wanphai ruh na kylleng ki Ri ka pyrthei. Ki long kiba stad, kiba khlain bor bad kiba shaniah ha u Blei, u Blei u Abraham u Isaak bad u Jakob kein. Ki la leh ia ki jinglehniam jong ki na ka bynta u Blei wat lada kim don Temple, ki shu mane ha ka mynsiem bad ha ki kynroh ka Jerusalem. U Blei u la ai pat ha ki Israel sa shisien pat ka por bad ka Bor.

Kumta, ha u snem 1967 AD ki Israel ki la dakhol ia ka Jerusalem ha ka thma kaba tang 6 sngi. Baroh ka pyrthei ka phylla ia kane ka thma kaba tang 6 sngi ba ka Israel ka la jop da kaba ka la ioh knieh ia ka Jerusalem na ka kti ki nongshun jong ki ki Arab kein.

Ia ka kyntien ISRAEL la thoh 2000 sien ha ka Bible. U Blei u kren shaphang jong ka, ka dei ka Ri jingkular ia ki khun Israel kein.

Kaei kaba ngi iohi hangne ka long ba u Blei u la nang iai pyndep ia la ka ktien bad ki kular halor ki Israel. Bad um klet ruh pat ia kiwei pat ki jaid bynriew Jentil. U Blei u pyndep ia ka kular halor ki briew baroh lada tang ma ki ki kloi ban ngeit bad kohnguh. U la ai ka jing pynim ha ki Jentil, u ai ruh ha ki Jiw (Israel).

Shisha, ngi long ka pateng kaba iohi ia kine kiei kiei ia kaba ka ktien u Blei ka kren. U Jisu u ong – “Haba phin iohi ia kine kiei kiei baroh, To tip ba ka long hajan – ha ki jingkhang” Mathaios 24:33.

Mynta ka pyrthei ka don ha ka jingkhang jong ki por ba jynjar bah jynjar san, ka bym pat long na myndang long ka pyrthei. Mathaios 24:12. Kata tang shu la sdang ban pynieng pat ia ka Temple kaba Lai ha Jerusalem. “Kata ka ia ka long hajan” Jingpynpaw 1:3.

Na kata ka daw ka dei ia uwei pa uwei uba ngeit, un ngeit shisha ha ka ktien u Blei, bad ban iaid ha kata ka jingngeit, ioh ba ngin jot noh. Ki Israel kiba 1875 snem mynshuwa ki jot noh, namar bym don jingtip ia ka ktien u Blei. “My people are destroyed for the lack of knowledge” Hosia 4:6.