Ki 10 hajar iing ki Gorkha ha Lumpi, ki kwah ban sah bad ka Assam

Guwahati: Ki 10 hajar iing, ki jaitbynriew Gorkha, kiba don ha khappud jong ka Assam-Meghalaya, ki la rai ba kin iai neh bad ka Assam bad katei ka dei ha shwa, ba ka jing ia pynbeit pud ha ka sien kaba ar, kan sdang hapdeng ka Assam bad ka Meghalaya.

Ki nongialam jong ka Assam Gorkha Sanmilan (AGS), hynnin ka sngi, ki kren shai ba ki briew kiba shong ha Lumpi jong ka Kamrup district bad Umlapher ha West Karbi Anglong district, ki kwah ban shong ban sah beit ha Assam. Katei ka dei ha ka jing iakynduh jong ki nongialam jong ka seng AGS, ha ka jingialam jong U Krishna Bhujel, President bad U Lakshmi Sedai, general secretary ia U Atul Bora, myntri ba peit ia ki shnong khappud bad ba ki la aiti ruh ia ka dorkhas jongki sha utei u myntri.

“Naduh ka por jong ka jing laitluid, ki briew jongngi, ki shong ki sah ha ki shnong khappud. Ngi don shibun ki jingeh bad ngi la rai ban shong ban sah ha Assam bad ngim kwah satia ban leit sha Meghalaya” ong U Lakshmi Sedai, General Secretary ka AGS.

“Ka la don mynta 100 snem, ba ki briew jongngi ki shong ki sah ha Lumpi bad ki dei ki briew jongngi, kiba iada ia u pud u sam, na ka jingtuh jaka na ka jylla ba marjan bad ka dei namar ka jingdon jong ki briew jongngi, ba kim shym la lah satia ban kurup ia ki jaka puta jongngi” ong U Sedai.

“Ki Gorkha, ki la don ha Lumpi, naduh ka spah snem ba 19 bad ki longshwa jongngi, ki ioh bor ban ot phlang ha katei ka por na ki British. Ngi don 600 tylli ki longiing ha lane 3hajar ngut ki nongshong shnong ha Lumpi bad ka don tang kawei ka shnong, kaba ki don ki Khasi, kata ka dei ka Moulan.

Ha West Karbi Anglong ruh ki don 7hajar ngut ki Gorkha, ha ki 12 tylli ki shnong khappud bad kitei ki kynthup ia ka Habang, Umpalher, Mausaladyang, Umwang, Umru-2, Umsarang, Phlang, Pabang, Kartik Gairi, 28th Mile, Sabire, Jatalang, Umat, Lang Er Dang, kiba dei ki shnong ba ki bun bah ki Gorkha, ula ong bad ula ong shuh shuh ba ka ishu kampud jong ka Assam bad ka Meghalaya, ka dei kaba la ia pynbeit naduh u snem 1951, ha ka por ba thaw ia ka United Mikir Hills District.