Khyrwit kuli ki SWAT bad ki GNLA ha ki thain Shallang

Nongstoin, 29 Naiwieng:
Myn ha ka sngi thohdieng jong ka taiew ba la lah ka la don ka jingiather kuli kaba jur hapdeng ka kynhun kaikhlaw ba la ialam da u Jimmy u ba dei u snar jong ka GNLA bad ka kynhun jong ki pulit ka Shallang PS bad ki BSF kaba la jia ha ka Shnong Riangud ha ka por 12:30 mynmiet, ka shnong kaba jngai tang kumba 25 KM na Shallang PS.
Katkum ka khubor ba la ioh lum na ki bor pulit ka Shallang PS, la iathuh ba ha katei ka jingiather kuli, ym shym la don mano mano ba iap ne mynsaw. Hadien katei ka jingiather kuli kaba jur bha na ka liang jong ki pulit ka Shallang PS, ki la leit sha katei ka jaka bad na katei ka jaka, ki la ioh ban kurup ia ar tylli ki mobile phun bad kawei ka pla ka ba dei jong ka kynhun GNLA.Shuh shuh la ioh jingtip ba mynta ka sngi ka 29 tarik ka la don biang ka jingiather kuli hapdeng ka kynhun pulit SWAT  ka Shallang PS bad katei ka kynhun kaikhlaw jong u Jimmy ha kawei ka khlaw kaba la tip kum ka khlaw Mawmluh ha jan jong ka shnong Riangud.Ha katei ka jingiakhun ka kynhun pulit SWAT ka hap ban sngeh noh ia ka jingiasiat namar ka jingdon jong ki riew paidbah ha katei ka khlaw bad la ioh jingtip ruh ba ha katei ka jingiasiat ruh khlem don ba iap ne mynsaw bad ki kynhun kai khlaw ka GNLA, ki la lait noh ban phet krad na katei ka jaka.
Na ka liang jong ki pulit ha ryngkat ka kynhun SWAT ki dang ia pynlong ka jingthwet kaba jur ia katei ka kyhun jong u Jimmy bad na katei ka khlaw ki pulit, ki la ioh biang ban kurup ia u wei u kynjri teh kti ba pyndonkam da ka GNLA.