Khyrwit ka NSCN, ULFA iap 20ngut ki shipai ha Manipur

Guwahati, 4 Jylliew:
20ngut ki shipai jong ka 6 Dogra infantry, ki la shah pyniap ha ki ehrang, ha ka step jong ka sngi palei, ha ki bynta jong ka Moltuk, kaba dei ha Chandel District, kaba mar ia khappud bad ka Myanmar jongka Jylla Manipur. 12ngut na kitei ki la mynsaw jur, ha ka jingshah hiar thma, ha ka sien kaba lai, ha katei ka thain ha ki lai bnai ba ladep.
Katei ka kynhun, kaba ia trei lang kawei kaba la tip da ka kyrteng jong ka United Liberation Front of Western South East Asia, ha kaba ki kynthup lang ia ka NSCN (K), Ulfa (I), Kamatapur Liberation Organization bad ka NDFB (Songbijit), ki la kam trai ia katei ka jinghiar thma bad pyniap ia kitei ki 20ngut ki shipai. U nongialam jong ka seng ULFA(I), u la pyntip sha ki lad pathai khubor telebishon, ba la leh ia katei ka kam, katba kum ka hukum jong u nongialam jong ka kynhun, U SS Khaplang.
Ha ka 2tarik Iaiong, ki don lai ngut ki shipai, kiba la shah pyniap ha ki ehrang NSCN (K) ha Tirap district jong ka Arunachal Pradesh bad ha ka 3tarik Jymmang, 7ngut ki shipai Assam Rifles bad uwei u shipai Territorial Army, ki la shah pyniap ha Mon District jong ka Nagaland, ba la hiar thma da katei hi kajuh ka kynhun United Liberation Front of Western South East Asia.
U nongai khubor jong ki shipai, U Lt Col S Newton, haba iathuh ha ki kotkhubor, u ong “Ngim don ia ka jingtip kaba biang, hynrei, la antad, ba kiba iap, ki poi sha ka 17ngut”.
La iathuh ba ia ka kali kaba iaid ha khmat, la khyrwit da u roket, katba ia ki kali kiba bud na dien, la ther da ka jingkhyrwit kuli kaba jur bha. Ia ki shipai kiba mynsaw, la kit mar mar da ka helicopter jong ki shipai ha ka hospital jong ki shipai ha Leimakhong, kaba don hajan Imphal.