Shillong: Ka Langsning FC ka la ioh biang ia ka jingkmen hadien ba ka la lah ban khyrwit 3-0 kol ia ka Bengaluru FC reserve ha ka jingiakhun ka Group C ka lympung Second Division League kaba long mynta ka sngi ha Bangalore.
Ia kine ki lai kol ka Langsning la thep kawei da u nongialehkai nabar ri u Lancine Toure ha ka kyllastep, pynbud sa u Kitboklang Pale bad u Brolington Warlarpih ha ka kyllamiet ban pyllong ia kane ka kynhun ialehkai na Shillong ban khur lai point na kane ka jingialehkai.
Kane ka dei ka jingshah rem kaba nyngkong jong ka Bengaluru ha kane ka lympung bad ka dei ka jingjop kaba lai ia ka Langsning.
Ka jingjop ka la pyllong ia ka Langsning ban kiew na ka kyrdan ba saw sha ka kyrdan ba nyngkong jong ka Group C da kaba kamai 12 point na ki 8 tylli ki jingialehkai da kaba tam shi point ia ka Bengaluru bad ka la tam ruh 3 point ia ka Mohammedan Sporting.
Ha ka jingiakhun ka la kyllastep shwa ban wai, u Toure u la ioh ban thep ia ka kol ba nyngkong hashwa lai minit ban wai kane ka kylla.
Hadien bas dang ka kyllamiet, ka Langsning kam shym la leh jem satia namar ba kam pat shngain tang kawei ka kol ba ka la ioh bad u Kitboklang Pale u la ioh sa kawei ha ka 89 minit ban kham pynskhem bad ka kol kaba lai la thep da u Brolington Warlarpih ban ioh syndon ia ka jingjop.
Mynta ka Langsning kan pynkhreh ban leit iakhun sa sha Jamshedpur ha ka 1 tarik Jymmang.