Khyrwit ka Israel, ia ka ktem buh tiar siat ki ehrang ha syndah ka iingmane

Tel Aviv: Ki shipai Israel, ki iathuh, ba ki la ther bom ha ka khrum jong ka iingmane blei ki Muslim, ha West Bank, ha ka Sngi U Blei. Ka khubor jong ka Israel Defense Forces (IDF), ka iathuh, ba katei ka dei ka phyllaw, ba la ju pyndonkam, da ki ehrang Hamas bad ka kynhun Palestinian Islamic Jihad, ban leit hiar thma sha ki jaka bapher.

Ka jingiap, haduh mynta ha Gaza Strip, ka la poi sha ka 4,469 ngut, katba ki don 1,400ngut, kiba la iap, ha ka jinghiar thma ki ehrang Hamas sha Israel.

Katei ka jaka, kaba la hiar thma, da ka Israel, ka dei ka al-Ansar Mosque, ha kaba ka don ruh ka jaka sah ki poiwir lane ka Jenin refugee camp. Ki shipai Israel, ki la pyni ruh ia ka thliew kaba rung sha ka jaka rieh jong ki ehrang bad kaba dei ruh, ka jaka, ba ki ju buhrieh ia ki tiar ialeh jongki.