Khyrwit ka Eriong, julor 32 tylli ki ing ha Mawlam

Pynursla, 2 Jylliew:
Ka la don ka jing khie eriong kaba jur ha ka miet 2 tarik u jylliew ha ka shnong Mawlam, ka shnong kaba don sharum Pynursla bad ha katei ka jingkhie eriong, ki la don haduh 32 tylli ki ing kiba la shah rat bad kawei ka longkmie ka la mynsaw jur, katba ki la don kumba 7 ngut kiba mynsaw malu mala.
Katei ka jingjia ka la jia ha ka por 1 baje shiteng synnia mynmiet, don na kiba la ioh thiah bad don ruh kiba dang khreh thiah ha ka por ba jia katei ka jingjia. Napdeng ki 32 tylli ki ing kiba la shah rat ha ka eriong jong ka miet 1 tarik, ar tylli ki la thung khongpong bad ka la kit shariat, katba kiwei pat ki dei kiba shu khyllem, shah lied ka tnum bad kiba la shah pynjot.
Ki ing kiba julor eh ha katei ka jingjia ki long ka ing jong ka Romi Buhtep, ka ing jong ka Pu Buhtep, ka Phah Khongngain, ka Khang Khongngain , ka Blok Dkhar bad kaba la thung baji bad shah kit sha riat ka dei ka ing jong ka Ksoin Buhtep bad ka iing jong ka Wanra Buhtep, nalor ka iing briew ka eriong ka la lied ruh ia ka tnum jong ka Aganwadi Centre ne ka iing sam shana. Ka Ksoin Buhtep kaba shong ha Mawiang kawei na ki kyntoit jong katei ka shnong ka dei ka longkmie kaba la mynsaw jur ha katei ka jingjia namarba ha ka por ba la jia katei ka jingjia ki dieng kiba la khyllem na ka ing ki la pakhuh na ki bynta ka khlieh jong ka bad ka dur ka dar jong ka ka la at. Ha katei ka jingjia ka eriong ka la rong ruh ia ki tiar ki tar na ing briew haduh ba kim la syrngiew shuh.
La ong ba khyndiat minit shuwa ban jia katei ka jingjia kiba bunbah ki briew jong katei ka shnong ki dang ioh thiah lyngngai , hynrei ki la kyndit ban iohsngew ia ka jingbeh lyer kaba jur ha katei ka miet, don na ki kiba la khie naba thiah naba ka la ai dak lypa ba kan dei ka jingkhie eriong kaba jur. La iathuh ba tang kumba katto katne por hadien ba ka la ai dak ka lyer kaba jur ka la wan kynsan puk bad ka la rat naphang ia ki ing briew, ha kaba la ong ba kitei ki ar tylli ki ing kiba la julor bha ki dei kiba la shah rat naduh tynrai bad ka rong wut sha riat, hynrei ha katei ka por ki trai jong ka ing ki la ioh ban kynriah noh shabar.