Khyrwit ka eriong ha nongbah Delhi

NewDelhi,
30 Jymmang:
Ka ‘Eriong kaba shyrkhei bad u lapbah uba jur mynta ka janmiet ki la khyrwit ia ka nongbah Delhi, bad ha katei ka jingjia bun ki diengbah ki la shah rat bad ki paia ki la khyllem kiba la wan rah ka jing julor kaba jur ha katei ka nongbah jong ka Ri.
Katkum ka jingia thuh jong kawei na ki lad khubor, la iathuh ba ha katei ka lai tylli na ki liengsuin ki la shah pynjulor ha katei ka eriong, bad bun tylli ki kali ba la pynieng ha ki jaka ieng kali ki la shah ban ha ki diengbah ba khyllem.
Katei ka jingther u lapbah ka la pynduna ia ka jingshit kyrang ka sngi ha katei ka nongbah kaba la poi rurh sha ka 43.7 degree Celsius kaba dei ka jingthew kaba shit tam jong ka aiom ha katei ka nongbah. Ki paidbah kiba don ha katei ka nongbah ki la mareh sharum shaneng ban wad jaka rieh na katei ka eriong bad u lapbah.
Ka jingtip ba la ioh lum na kawei pat ka lad khubor, ka la iathuh ba haduh 18 tylli ki liengsuin kiba pyndonkam tang hapoh ri lajong bad kawei pat kaba pyndonkam shabar ri la hap ban pynkynriah noh sha kiwei pat ki kad liengsuin.”Katei ka eriong ka dei kaba khlain bha, kaba la lah ruh ban pynkhyllem wat ia ki paia ha ki jaka ieng kali” ong u Ranjana Narayan, uwei na ki nongthohkhubor.
La iathuh ruh ba -ar tylli na ki ktem ba bunkam tam ka Delhi Metro services ka Yellow bad Blue ki la shah ktah ha katei ka jingjia. Ki paidbah ki la iathuh ba la pynhiar ia ki ha katto katne tylli ki station rel namarba ka rel ba ki shong ka la don jingthut hadien ka jingshah khyrwit ha u eriong, la ong ba hadien u slap ka jingshit ka suin bneng ha katei ka nongbah ka la hiar sha ka 29.1 degree Celsius.
Kham hadien la ioh jingtip ba la don ka jingiap briew 9 ngut ha katei ka jingjia.