Khyrwit ka eriong ha ka thaiñ Nongthliew, julor bun tylli ki ïing ki sem

Nongstoiñ: Myn hynnin ka nohsngi, ha ka por kumba 2:30 eiei, ka eriong kaba jur ka la wan kynsan kynsan ha ka thaiñ Nongthliew ha kaba kiba bun tylli ki ïing ha ki shnong jong katei ka thaiñ ki la julor lut.

Katkum ka tyllong khubor ba la ioh lum, la ong ba katei ka eriong ka la ioh ban jynrat ia kumba 40 tylli ki ïing ha katei ka thaiñ bad ki shnong kiba la shah ktah jur ha katei ka eriong ki kynthup ia ka Nongthliew, ka Umthlong Kyrsen, Umthlong Kharmuti bad Langkyrteng kiba hap hapoh ka Mairang C&RD Block.

Shuh shuh ka tyllong khubor ka iathuh ruh ba ha katei ka jingjia, ki la don ruh ki briew kiba mynsaw bad ia kitei kiba mynsaw na ka liang jong ki bor ba halor jong ka Mairang Civil Sub-Division, ki la pynkit noh sha ki jaka ai jingsumar.
Haduh bala thoh ia kane ka khubor ym shym pat la lah satia ban ioh jingtip ka bniah namar ba ki bor ba dei peit ki dang pynlong ia ka jingjurip bad ruh ban ai jingiarap ia ki lanot ha katei ka jingjia.