Khyrwit ka Congress, liem u pastor na Konstitwensi u bah Ardent Khyrwait u ma Shibun na Konstitwensi u bah Paul

Shillong,18 Jymmang:
Ka Resol MP 2014 kaba la pynbna ha ka 16 tarik u jymmang, ka la pynkyndit bad pynlyng ngoh ia ki nongkyrshan jong u Pastor PBM Basa iawmoit kiba la khmih lynti ba u kyrtong jong ki un ioh ia ka jingjop ha kane ka kynti ba mynta. Kaba kham pynkyndit shuh shuh ka dei ka jingshah rem, jong u Pastor na Konstitwensi u bah Ardent Basaiawmoit, KHADC uba dei ruh ha ka juh ka por u Vice President ka HSPDP , ka seng riewlum kaba la ai jingkyrshan ia u Pastor PBM ha kane ka elekshon ba la dep, katei ka jingshah rem u Pastor na Konstitwensi u nong ialam ba hakhmat eh ka HSPDP ka la pynlyngngoh ia ki paidbah namarba ki la shim beit ba na katei ka konstitwensi u Pastor un tam kput namarba u bah Ardent u dei u MLA bad  ym tang u MDC hynrei u CEM. Ha Konstitwensi u bah Ardent u Pastor PBM u la wan-ba-ar ha kaba u la ioh 5976 vote, katba u ma Vincent Pala ka Congress u la jop na katei ka Konstitwensi bad u la ioh 6187 vote. Ka jingjop u ma Vincent na katei ka Konstitwensi ka pyni ba ki paidbah katei ka konstitwensi ki la phai khmat sha u nongmihkhmat barim jong ki uba dei na ka seng Congress  u bah Lambor Malngiang.
Shuh shuh ki la don kiwei ruh ki Konstitwensi kiba ka HSPDP ka  bat ia ka bor hynrei u Pastor u la shah rem, tangba kitei ki konstitwensi ki dei kiba ka HSPDP ka don tang ki MDC katba ki MLA pat na ka seng Congress. Ha Mylliem Konstitwensi u Pastor u la ioh 4687, kaba ka kong Teilinia Thangkhiew ka dei ka MDC hynrei u Ma Pala u la tam tang khyndiat na katei ka Konstitwensi kaba don u MLA Congress u bah R.V Lyngdoh,  u bah Pala u la ioh 4926 vote. Ha Pynursla pat ka kong Grace Mary Kharpuri  kaba dei ka MDC  ka Nongshken la iohi ba kam lah thaw pyrthei naba ha katei ka konstitwensi u Pastor PBM u la shah tam kput ha ka Congress kaba u bah Prestone Tynsong u dei u MLA. Ka Resol MP 2014, ka la pyni ba u Pastor u la lah ban leh bha tang ha West bad South West Khasi Hills ha kaba bun na ki konstitwensi u la jop.
Kaba kham phylla shuh shuh ha kane ka Resol MP kaba mynta ka dei ka jingshah rem u bah Paul  Lyngdoh , kyrtong ka UDP wat ha ka konstitwensi lajong kaba mau-u u dei u MLA. Ha ka konstitwensi u bah Paul ka Shillong West u ma Shibun Lyngdoh u la ioh haduh 6591 vote kaba long jan ar shah ia u bah Paul uba la ioh tang 3921.