Khynra ophis ka FKJGP, bym burom Tirot Sing

Shillong, 17 Naitung: 
Ka Seng FKJGP Seng Kmie hapoh ka jingialam u Bah Marbud Dkhar, Bah Wankmen lang Tariang bad Bah E. S. Cajee ryngkat bad ki dkhot jong ki Circle jong ka Seng mynta ka sngi ka la  khynra bad khang syndon ia lai tylli ki ophis treikam jong ka Birla Sun Life Insurance, ka Reliance Life Insurance bad jong ka Reliance Company kaba don ha Lachumiere halor ka nongrim ba kim shym suidniew ne burom shuh ia ka shuti kaba la ithuh bad ai da ka Sorkar Jylla ban kynmaw burom ia ka Lyngkhuh Sngi Iap u Khla wait ka Jaitbynriew Khasi u Paiem Tirot Sing Syiem.
Ka Seng lyngba u Chief Organiser ka FKJGP Seng Kmie u Bah Marbud Dkhar u la ai ka jingmaham ba kum kine ki jingleh pyrshah ban plie ia ki ophis treikam jong kino kino ki Company ha kum kine ki sngi, ka dei kaei kaei ka bym lah ban pdiang bad ka Seng ka kyntu ia ka paradoh parasnam jong ka Bri u Hynniewtrep ban shim ka jingkitkhlieh ban pyntip sha ka Seng lada don ki jingleh pyrshah kiba kum kine.
Kyntang iawai ka Seng ka maham ia ki Company kiba ju mlien ban phah wan trei jubor ia ki paradoh parasnam jong ngi kiba don bad trei ha kine ki Company bad lada jia ba kim suidniew kum ka Seng kan sa shim pat da ki rai kiba tyngeh.
Ki nongialam ki dang iakren bad ki heh jong ka Insurance bad ki nongtrei office kiba la iamih noh na ka jingbeh jong ki dkhot ka FKJGP.