Khynra nongdie madan ka KHADC, kylluid war ka lynti iaid kjat

Shillong, 8 Naitung:
Ha ka sien jam kaba nyngkong eh ka PDF kaba la ialam ia ka EC ha KHADC ka la leit ban khynra ia ki nongdie madan hadien ba ka la wan ha ka bor synshar. Lah ban pynkynmaw ba katei ka jingkhynra laisen, nongdie madan ka la khih win bha ha ka por ba U bah Ardent M Basaiaw moit u dang long u CEM, hynrei mynta ka EC ba ialam da ka PDF ruh ka la sdang ban pynkhih biang ia katei ka kam.
Mynta ka sngi ka tnad khaii pateng ka KHADC, ka la phah ia ki pulit Enforcement ka KHADC ban leit khynra ia ki nongdie madan kiba shong die jingdie be-ain ha ki lynti iaid kjat ha shi lynter ka surok. La iohi ba ki pulit KHADC ki la leit ban khynra sha ki thain Iew mawlong, G S Road kaba don ha Bimola bad ha shi lynter katei ka surok. La iohi ruh ba don ki tiar ki tar ki nongdie madan kiba la shah lum bad la pynkit ia kitei ki tiar sha District Council, bad don ruh ki ba la lum hi noh dalade shuwa ban poi ki Enforcement.
Haba kren sha ki nongthohkhubor, u EM ba peit ia ka tnad khaii pateng ka KHADC u bah James Sylliang u la ong ba ka jingleit ban khynra ia ki nongdie madan kiba shong ha ki lynti iaid kjat ha surok ka dei hadien ba ka KHADC ka la ioh jingujor na ki paidbah ba ki nongdie madan ki la pynkhapngiah ia ka lynti syngkien bad ki la pynwit palat ia u paidbah uba iaid ba ieng.
U EM u la ong ba ki don ki tiar kiba la shah rah ruh ha katei ka jingleit khynra kaba u la ong ba lada ki trai tiar ki kwah ban ioh biang ki dei ban wan sha KHADC bad ki hap ban siew ia ka kuna katkum ka ain Trading by Non Tribal Act. Shuh shuh u la ong ba katei ka jingleit khynra kan long na ka por sha ka por katba dang iohi ba dang don ba shong die be-ain ha ki lynti iaid kjat.
Hadien katto katne ba ki Enforcement ki la dei khynra, u nongthoh khubor u la leit ban iaid biang sha kitei ki jaka ba la dep khynra ha ka por mynsngi bad la lap ba ki lynti ki syngkien ki la kylluid war. Bunsien la ju iohi ba haba ka District Council ka ju leit ban khynra ia ki nongdie madan ka lynti ka la kylluid war hynrei tang hadien shisngi la dap biang mam, halor kane u bah James Sylliang u la ong ba ka KHADC kan pyrshang ban leit khynra la kumno kumno shisien ne ar sien ha ka shi taiew . Ki nongdie madan kiba la shah kyndang mynta ka sngi ki kynthup naduh ki khar die shana, ki nongdie wai dong, ki nongdie juti madan, nongdie jain madan , ki nongdie pan snieh , mobile bad kiwei.