Khynra ki pulit baroh shimiet, ioh kem 3 ki ASAK, 1 GNLA

Tura, 1 Rymphang:
Ha ka jingkhynra kaba bteng hynnin baroh shimiet, ki pulit, ki la ioh kem ia 3ngut ki dkhot jong ka ASAK bad uwei u dkhot jong ka seng kaikhlaw GNLA, ha ki bynta jong ka South Garo Hills.
Hadien ka jingshah rahbor jong ki 4ngut ki riew paidbah, na Kolapara, ha ka 22tarik u bnai ba ladep, ki pulit, ki la iai bteng ban khynra bad ban wad ia kitei kiba shah rahbor bad ha ka 27tarik u bnai ba ladep, uwei na kiba shah rahbor, U Nilip Ch. Momin, (27) na Williamnagar, uba dei u nongniah jong ka trok, kaba don ia u number ML07B 3172, la pyllait noh da kitei ki nongrahbor, khlem da dawa pisa eiei ruh em.
Na ka bynta kiwei pat kiba dang shah bat ha kti jong kitei ki nongrahbor, kiba ha iing, ki la mad ia ka jingshah dawa pisa kaba heh bha, ha kaba U Reding T Sangma uba dei u heh duh jong ka seng ehrang ASAK, ula dawa pisa kaba heh bad ba ula aiti ia katei ka kam ha U Nikseng D Shira, uba don 22snem ka rta, ba un leit ai ia ki shithi dawa pisa sha kiba ha iing jong kitei kiba shah rahbor; hynrei utei u la shah kem noh ha ki pulit jong ka Baghmara, ha kaba ki la ioh ruh ia kitei ki shithi, kiba dei ban leit ai sha kiba ha iing jong kiba shah rahbor. Kumta lyngba ka jingialam lynti jong U Nikseng, la ioh ban pyllait im ia kitei ki lai ngut kiba shah rahbor, ha ka miet jong ka Lah Sngi U Blei, khlem da donkam ban siew pisa eiei satia. Hadien ba kitei ki lai ngut kiba shah rahbor, ki la lait, la nang ioh jingtip shuh shuh, da ki pulit bad kumta ki la leit ban khynra ia kiba bun ki jaka rieh bad kumta ha ka jingkhynra kaba kut haduh mynta ka step, la ioh ban kem ia kitei ki lai ngut ki dkhot ASAK bad kitei ki kynthup ia U Sahid Ch Marak, 26 snem uba na Chigichakgre, Chokpot PS, U Lamingstone Ch. Sangma, 29 na Chigichakgre, Chokpot PS bad U Jainish R Marak, 29snem uba na Mindikgre jong ka thanat Baghmara. Katba ha kawei pat ka jingkhynra jong ki pulit ka Nongalbibra, ha ka shnong Nawak ki la ioh kem ia U Herod R Marak, 32snem, mynta ka sngi, dang step phyrngab bad utei u dei uba dang shu leit pyniasoh shen ialade bad ka seng GNLA.