Khynra ia ka dukan Marwari “lap ia ki jingbam ba la dait khnai”

Shillong,14 Jymmang:
Ha ka sngi saitjaiñ jong ka taiew, ka tnad kaba peit ia ka bit ka biang ka bam ka dih ha ka jylla ka Food Safety ka la leit khynra ia ka dukan die marbam jong uwei u Marwari kaba don ha Keating Road. Katei ka jingleit khynra ka dei hadien ba katei ka tnad ka la ioh jingujor na u Rangbah Dong ka Bomfyle Road u bah Keith Kharshiing. Katei ka dukan ka dei kaba la tip kum ka Patanjali kaba dei trai da u S.S Agarwal. La ialam ia ka kynhun leit khynra da ka kong BDS Mukhim Assistant Commissioner Food Safety bad u bah Nathaniel Lyngwi u Food Safety Officer ha ryngkat ka jingdonlang ki pulit ka Sadar PS.
Ka jingleit khynra ka dei namarba ka la don ka jingujor ba ka don ka jingdie be-aiñ ia ka um bam ha katei ka dukan.
Ha ka jingleit khynra katei ka tnad ka la lap ba 3 tylli ki klong um kiba 20 litar kiba la die ha ka dor kaba tad tang T.100 tyngka bad kitei ki klong ki don ia ki kyrteng jong ki kompeni Prime, Camper bad Savor, hynrei u Agarwal um shym don kano kano ka jingiateh bad kine ki kompeni bad la suba ba ia ka um ruh u shu phylliew na la ing kaba don ha Bomfyle Road ka ing kaba dei trai da ka u wanrah na ka ing ba u shong u sah ha Bomfyle Road ia kaba la dei trai da ka Assam Pradeshik Marwari Sammelan Shiksha Kosh Trust jong ka Marwari Committee na Guahati.
La leit ban khynra ruh ha katei ka jaka sah jong u bad la lap bun tylli ki klong thylli, ki jingdih umsoh Cocacola, Pepsi kiba la kut tarik bad la lap ruh ba u die ha dukan ia ki jingbam kiba la shah dait khnai.Ka tnad ba peit ia ka bam ka dih ka la ong ba u SS Agarwal um don ia ka Food License kaba pyni ba u la pynkhein ia ka ain 31(1) jong ka Food Safety Act bad kaba mana ia uno uno u nongdie jingdie ban buh ia ki marbam.
“Ngi lap ba u SS Agarwal u la pynkhein ia ka Section 31 (1) jong ka Food Safety Act kaba uno uno u nongdie jingdie um lah ban buh mar bam khlem ka Food License “, la ong ka kong DBS Mukhim ka bym shym la ihun ia ka rukom die marbam utei u Marwari. La kurup ia baroh ki klong um kiba la ioh na ingsah jong u.