Khynra dukan ka HANM, lap ia ki bar jylla, ha dukan khap shniuh

Shillong:Ka seng Hynniewtrep Achik National Movement Ri War Mihngi Circle, ha ka sngi nyngkong, ka 22 tarik u Nailar 2022 ki la hiar ha kylleng ka Iew bah Pynursla, ban khynra ia ki Labour License bad ki la lap, ba haduh 5 ngut ki bar jylla ki bym dei khasi kiba shong bylla dukan khapshniuh ha ki dukan jong u Khasi.

Kane ka jing khynra License ia ki bar jylla, kaba la ialam da u president ka HANM ka Ri War Mihngi, u Bah Shaibor Nongrum ba haduh 5 tylli ki dukan khap shniuh ha Pynursla, ba ki trei da ki khyllah jait. Ha ka jing iakren bad ki trai dukan, ki iathuh ba ka jingwanrah briew, ia kiba nabar, ka dei ba ym shem la don ki paradoh para snam kiba treh ne shong dukan bad lada ki don makna ruh kim shem la neh ne shong slem.

Ha ka jingiakren, ka seng HANM, ka la pynsngewthuh ia kitei ki trei dukan bad ka la bthah ba hapoh 2 bnai, dei ban weng noh mardor ia kitei ki bar jylla bad dei ban ai kam ia u khasi. La ong ruh, ba lada jia, ba ym ioh ia u khasi, ba shong dukan khapshniuh ka seng kan kit khlieh bad trei shitom ban pyn wad ia ki samla khasi ban wanrah ban ai bylla ha ki tei ki trai dukan.

Shuh shuh U President ka seng, ula pyni ka nuksa ban pasiaw ia kitei ki trai dukan, kiba dei ki khasi ba ka jingwan rung ne shong shngain ki bar jylla hapoh ka khyndew ka shyiap jong u Khasi, ka long kaba ma, namar ba nyngkong ki wan tang 3 ne 4 ngut, hynrei suki suki, ynda ki la sngew longtrai ki ialam ban buhai shong ne wat ban ioh lok iong tnga da ka khasi bad ha katei ka por, wat u trai khyndew kim nud shuh wat ban nguid umbiah, ha jaka lajong bad u da pyni nuksa ia kiwei ki jaka, kiba la shlei mam da k ibar jylla, kum ha ki thain Jhalupara, Them Iew Mawlong, Dawki ne Ladrymbai kaba la shu dap smam tang da u khyllah jait.

Ka seng kala pynpaw ka jingsngew khia ba ka jingwan rung jem rung suk ki bar jylla hapoh ki iew Khasi, ka dei namar ka jingleh sting ka sorkar MDA ban ai noh ia ka Inner Line Permit, kaba bun ki sengbhalang, ki la dawa laslem. ka seng ka la maham ba nangne shakhmat, ki bor shnong, ki dei ban sangeh mardor ban ai ka NOC ïa ki bar jylla.