Khynniuh biang ka shuki U Dr Mukul Iasoi 16 ngut ki MLA Congress, ban pynkhyllem ia u Dr Mukul

Shillong, 28 Naitung:
Ki MLA ka Congress ha kane ka jylla ki la iakhih biang ban pynkhyl lem ia u Dr Mukul Sangma kum u nongialam jong ka Congress Legislature Party bad ban pynhiar na ka shuki Myntri Rangbah.
Katkum ka tyllong khu bor kaba la iohlum, la iathuh ba ki don kumba 16 ngut kiba la iasoi ban pyn paw ia ka jingbym shaniah shuh ia u Dr Mukul kum u nong ialam. La ioh jingtip ba kine ki 16 ngut ki kwah ba u kam Myntri Rangbah ka dei ban leit biang sha u Bah DD Lapang bad u Deputy Chief Minister un ioh u Bah Prestone Tynsong.
Ka Congress ka don 29 ngut ki MLA bad lada 16 ngut ki kyntait ban kyrshan u Dr Mukul u lah ban khyllem shisha namar kiba kyrshan kin sa long 13 ngut.
Ka tyllong khubor ka iathuh ba ka daw ka jingia khih jongki, ka long ba ki don ki MLA Congress kiba sngew pyrshah ia ka rukom treikam u Dr Mukul Sangma namar ba u leh ‘nang marwei’ ia ki kam khlem da sngap lem ia kiwei ruh.
Ka jingleh marwei u Dr Mukul ka la pynkhuslai ia ki MLA bad wat ia ki minister ruh ki hap ban leit hajir ha u Myntri Rangbah haba leh ia kano kano ka kam.
Katkum ka jingtip u Bah Prestone u dei uwei uba pynkhih biang ia u Dr Mukul kumba la jia ha u snem 2010 ha kaba ka la don ka jingiakhih jong ki MLA ka Congress ban pynkhyllem ia u Dr Mukul hynrei kim lah namar ba la shaniah ka Sonia Gandhi ia u Dr Mukul. Ki MLA kiba pyniasoh sha ka Congress ruh ki don kiba rai ban ai jingkyrshan ia u Bah Lapang ban long biang u nongialam ban shimti ia ka kam Myntri Rangbah.Lah ban kdew ba u Dr Mukul Sangma u la shimti ia kam Myntri Rangbah ha u snem 2010 hynrei tang hadien ar bnai la don ka jingiakhih ban pynkhyllem hynrei u neh khlem don ba lah ban pynhap shuki. Kane ka dei ka sien kaba ar ia u ban shah pynkhynniuh ia ka shuki hadien ba u la shimti ia ka kam Myntri Rangbah naduh ba la jop ha kane ka elekshon MLA 2013 kaba dang shu dep ha u Rymphang. U Dr Mukul u la shimti ia ka kam Myntri Rangbah la san bnai haduh mynta.Hynrei haba iakren bad ki katto katne ngut ki MLA ka Congress ki la kyntait ba don kum kane ka jingiakhih ban pynkhyllem ia u Dr Mukul bad ki la ong ba kim tip ei ei.