Khynniat u SMR ia ki kharmetor ba kin iakren bad U Chief Secretary

Shillong: U Deputy Chief Minister u Sniawbhalang Dhar, u la ban jur ba ka sorkar ka angnud ban pynbeit ia ka jingeh kaba la slem ban pynkynriah ia ki nongshong shnong ka Harijan Colony kaba la tip ruh kum ka Them Iew Mawlong, khlem da pynslem shuh, wat haba ka sorkar ka la mynjur ban pynbiang HPC kham bun ka por.

Haba kren sha ki lad pathai khubor mynta ka sngi Nyngkong, u Dhar u la pynshai ia ka jinglong jingman mynta jong ka jingiakren bad ka Harijan Panchayat Committee (HPC). “Ha ka jingïalang kaba la dep, ki la pan sa 15 sngi, kaba ngi la ai. Nangta, ki la pan por shuh shuh haduh ka taiew ba khatduh jong u bnai Nailur. Ngi la dep ban ïakren ïa kane ha ka rukom kaba thikna, bad ha ka kyrdan jong u Chief Secretary, ka jingïalang ka lah ban long bad ki ha kaba kut jong kane ka taiew,” ong u Dhar, haba kylli shaphang ka jinglong jingman jong ka jingshah pynkynriah jaka jong ki 342 tylli ki longïing kiba sah ha ka colony.
Haba kylli lada ki jingkyrpad jong ka HPC ban pynjlan por ki pyni ia ki buit pynslem, u Dhar u la kyntait ia katei ka jingmut. “Kane kam dei ka buit pynslem”, u la ban jur. “Ki la pan por haduh kaba kut jong u bnai Nailur ban pynbeit ïa kiwei pat ki jingeh. Ngi’n ai ia ka ha ki. Ka jingïalang kaba hadien kan nym long ha ka kyrdan jong nga ne ka kyrdan jong u Deputy Chief Minister u Bah Prestone Tynsong, hynrei ha ka kyrdan jong u Chief Secretary.”

Kane ka long hadien ka jingsngewkhia jong ka Meghalaya High Court ha u bnai Naitung 2023 halor ka jingbteng ban pynslem ban pynbeit ïa ka jingeh ban pynkynriah jaka, kaba la long ka phang jong ka jingïakynad ha ka liang ka aiñ la bun snem.
Ha kaba sdang, ka HPC ka la kyntait ia ka jingtyrwa jong ka sorkar ban pynkynriah jaka. Hynrei ka jingkylla ha ka nongrim jong ki ka la wan haba ki la pan por ban pyrkhat biang. Ha ka jingbishar jong ka ïingbishar ba ha khlieh duh ha u bnai jylliew 2023, ka HPC ka la mynjur ha ka nongrim ïa ka jingtyrwa, watla ka la don ki jingpynkylla kiba la ai jingmut.

Ka plan pynkynriah jaka jong ka sorkar ka kynthup ban pynbiang ia ka jaka kaba 3.6 akar na ka bynta ban pynkynriah jaka, kynthup ia 2.14 akar hapoh ka jaka jong ka municipal board kaba la don lypa bad sa 1.4 akar kaba don pyrshah ia ka koloni kaba mynta.
Ka Harijan Colony ka la long ka pdeng jong ki jingiakren la bun snem, hynrei ki jingjia ba dang shen ki pyni ba ka jingkiew sha ka jingpynbeit ka lah ban don ha kaba kut.