Khyndiat shaphang U Dieng Bilat; ki khynnah Class-X

Babu Kular Khongjirem

Namar ba ka sorkar Meghalaya lyngba ka Education Department ka la phah hikai ia ki course ki khynnah class ix bad x tang ha ki electronic media(Dordarshan/AllI dia Radio,etc)hynrei ki klet pat ba ki kot khubor ruh ki dei ki atiar kiba biang bha ban ai jingtip bad ai jinghikai ia ki khynnah nalor ba ki poi lut kylleng ki kyndong kyn shrot ka ri jongngi bad ha ka dor ruh kaba dang lah ki kmie ki kpa ban thied,ngin pyrshang noh ban thoh khyndiat khynsoit hangne shaphang kawei ka poetry jong u myllung Soso Tham na ka kot Duitara Ksiar kaba dei shaphang u Dieng Bilat ba ki pule ha class X.Lada ki khynnah ki sngew ioh jingmyntoi bad ki kmie ki kpa ruh ki sngew ia hap halor kane,lah ban pynmih teng teng tang ha kine ki por ba dang don lockdown ne bym pat lah ban plie skul.

Ha shwa ba ki khynnah kin pule ban tip kham bniah ia ka jingmut bad jingthmu jong u myllung kiba don ha u Dieng Bilat,ki dei ban sngewthuh shwa ia ka nongrim ne thymmei(background) balei u Soso Tham u thoh ia une u dieng.Ha ka jingshisha,u Dieng Bilat dei hi ia u Dieng kseh ba ki ju ong u kseh Bilat.Une u dieng Kseh Bilat uba heh bad iar shi katdei eh u long kynjreng ha Mawkhar,mar pyrshah ka skul Goverment hyndai ia kaba mynta pat la pynlong office DSEO/SDSEO office bad parking lot Jaiaw mar pyrshah Synod complex bad Mawkhar Christian Hr,Sec School,Shillong.U myllung Soso Tham ha kito ki por u la long u nonghikai Khasi ha Goverment School ha class ix bad x wat la um pat pass wat tang ia ka matric ne SSLC ba ki khot mynta.Kum u nonghikai,u ju peit bad iohi man la ka sngi ia uta u Dieng Kseh uba don mar pyrshah ka skul.Une u dieng u lah ban shah ia ki bor ka mariang baroh saw aiom,la ia u slap uba jur,ka lyer ‘langthari ba khlain bor,u phria ha ki por lyiur.Une dieng u lah ruh ban shah ia ka jingkhriat ka tlang,ka jingshit ka sngi pyrem bad baroh ki bor ki mariang ki trei ia u khlem salia ne khlem riej shuh.

Kane ka jinglah jong une u dieng ban shah ia kum kine ki bor ka mariang ka la pyn lyngngoh bad khring jingmut pynban ia u myllung ba proh jabieng kum u Soso Tham ban pyn ia syriem noh bad u Riew Rangbah uba shisha uba don ki nongrim kaba skhem haba mut ban leh ia kino kinovki kam bah bad uba lah ruh ban iai shah ia ki jingeh ba har rukom ha shi lynter ka jingim jongu kumba lah u Dieng kseh Bilat ban shah ia ki bor mariang kiba pher bapher baroh shi rta jingim.

Kumta ruh u ‘riew rangbah u lah ban iakhun ia ki jingeh bapher bapher kiba u ia kynduh ha ka jingim jongu..Ban ioh jingmut ne ioh jinghikai bad ioh jingtip(lesson), ia ki longdien ia kum kine jinglong ba kin nang ruh ban bud nuksa(set an example),u Soso Tham u la thoh ia une u dieng ha ka dur ka poetry da kaba pynkren briew(personified) hi da une u dieng hi. Ha ka dkhot ba nyngkong(dk.1) jong kane ka poetry,(Ka sngi hanga…..ki thied ki suh shapoh)u myllung u kren shai ba une u dieng u lah ban iai shah ia ki bor ka mariang kum sngi,ka lyer,u slap,etc.Hynrei,dei kine pynban ki bor ka mariang kiba la pynlong pynban ia une u dieng ba un nang heh nang iar ki tnad bad ka lyer ba beh ia u ka la pynlong pynban ia une u dieng ban kham tip ban ksam pynskhem shuh shuh ia ki thied shapoh khyndew lym kumta u lah ban khyllem noh lada wan ka lyer kaba kham khlain.U myllung u ring jingmut pat nangne ba,ki jingthung jingtep baroh kum ki dieng ki siej kim lah satia ban san ban im khlem ka um(slap),ka jingshit bad jingshai(sngi)ne ka lyer(carbon dioxide ne oxygen).

Ha ka dkhot kaba ar(dk.2) pat,(Marwei nga long….Hapoh jongnga ki khih),u myllung u batai shai ba,namar ba u dei u diengbah uba heh bad uba iar bha,wat la u long tang marwei ruh hynrei u pynlong pynban ka lawbah lawsan la kham palat ban ia shibun ki dieng ha khlaw ha kane ka jaka ba u don.U ia ryngkat bad bun tylli ki dieng ha khlaw bad lada peit hi na jngai,i kumba u pynlong ka lawbah lawsan.Kane ka jingmih jong u tang marwei khlem don kiwei pat ki dieng kiban pynwit pynthut ia u ruh ka long pynban ka jingmyntoi ia ia u bad ka kabu kaba khraw(golden opportunity)ban ioh plan bad pyrkhat lait luid ia ki kam bah kam san kiban pyn myntoi bad sah burom junon junon ia ki pateng ban wan ha ka ri bad ka jait bynriew jongngi.Jin lada don bun ki dieng kiba lah ban long ki jingpynwit jing pynthut ia ka jingthmu ba iar jong u, kine ki jingiohi jngai jong u kin pulom noh pynban namar u hap shaniah ba kiwei kin leh ia kata namar ki dei kiba kham nang kham stad ban ia u.

Ka dkhot kaba lai(dk.3) pat,(Baroh u briew ba stad…..Kumno un lait ban kren) u kren shai ba,baroh u briew uba la kha bad mih sha kane ka pyrthei,u Blei u la ai ia la kajong ka jong ka sap ka phong bapher bapher.La kha iangi ryngkat bad ka sap jingstad bapher bapher tangba kata ka sap jongngi kan pulom noh lada ngim ioh lad ban pynpaw pyrthei ne ban pyntreikam ne sei madan ia ka.Dei ban plie ka lad ka lynti iangi ban ioh sei pyrthei ia kata ka sap jongngi lyngba ki lad ki lynti bapher bapher kum ka jingleit pule ha skul,ki music,ki sport,ki sap jingthaw jingshna,etc.Lada ka lad kam plie,kine ki sap jongngi kim pulom bad lehnoh ei hynrei lada ka lad ka plie, kin kylla shisha ki atiar kiba khraw shibun ia ka ri bad ka jaitbynriew nalor ba ki kylla long ruh kum ka pliang ja(kamai spah) ba ngin ioh kamai spah bad hajar lyngba kine ka sap kumba long lem kiwei kiwei kiba riew don sap kiba kamai spah na ki kam bapher bapher ha kane ka pyrthei kum ha ki kam sport,kam rwai,kam actor actress,kam nong synshar,kam business bad bun jait wat la ngim pat biang satia ki jingnang stad ne ki kyrdan pule ba biang ha ka jing im jong ki..(Yn dang bteng).