Khyndiat shaphang ka CM-Impact Guidebook jong ki khynnah klass -X

Babu Kular Khongjirem

Mynshem snem,ha ki bnai October-November 2024,ka sorkar MDA-II ha Meghalaya ka la khih khoh reh bha ban pynmih bad sam Guide Book sorkar sha man la ki skul wat haduh ki khynnah Private ruh ia ka kot iarap, ‘Ka CM-Impact Guide Book’ na ka bynta ki khynnah kiban ialeh(appeared) ia ka Exam Matrik ne SSLC Exam 2025 khnang ba kin kham bun kiba pass bha ha ka result SSLC Exam kaba ka la pynlong ha u bnai February jong mynta u snem 2025. Ki la pynpoi kyrkieh ruh sha ki skul tang kumba ar(2)/lai(3) taiew ei ei shwa ban khang skul noh namar ka la dei artad sa ka por X-mass bad dei ruh artad ka shuti tlang syndon.Ka sorkar lyngba ka MBOSE ka la pynthikna ruh ban set jingkylli kumba 50/60 marks ei ei tang na kato ka Guide Book sorkar.

Katkum ka jingbthah(directives/instructions) jong sorkar lyngba ka Education Department,ka MBOSE ruh ka la kohnguh bad don bun shisha ki jingkylli ba ki set na ka Guide Book sorkar, don ruh katto katne ki jingkylli SSLC kiba la pynkylla malu mala na ki chapter jong ka Text Book jong ki khynnah.Namar ba la dep ai lypa ia ki jingkylli bad ki jubab kumba leh ia ki khynnah rit,la khmih lynti ba ka jing pass ki khynnah mynta u snem 2025 kan kham kiew bun shah ban ia ka jingpass ha ki snem kiba la dep. Hynrei,ka jingkylli kaba mih na ki khynnah kiba pule klass-X mynta u snem 2025 lem bad ki kmie ki kpa(parents/guardians) jong ki khynnah kalong, ba, hato! mynta u snem 2025 ha ka Exam SSLC kaban long ha u bnai December 2025(kumba la pynbna da ka sorkar) kin set biang ne em ki jingkylli na kato kajuh ka Guide Book sorkar kumba ka la leh mynta u snem2025? Lada ki set biang na kane ka Guide Book sorkar,ka sorkar lyngba ka MBOSE ka la dei ban pynthikna sha man ki skul ba kin set biang na kajuh ka Guide Book khnang ba ki khynnah bad ki nonghikai ha ki skul bapher bapher bad ha ki subject bapher bapher ruh kin tip ban hikai bad batai lypa ia ki khynnah khamtam naduh mynta ba dang shu sdang snem.

Ka sorkar ka dei ruh ban sam noh shaid shaid ia kine ki Guide Book sha man la ki khynnah class X jong ki skul naduh dang sdang snem khnang ba ki khynnah ruh kin ioh pule noh bad pynkhreh lypa mar ia sdang snem. Kane kan iarap shibun ia ki khynnah bad ki nonghikai ruh kumjuh.Kim dei pat ban shu ia wan sam dier por tang shi bnai/ar bnai shwa ka Exam namar kane ka pynkulmar ym tang ia ki khynnah hynrei wat ia ki nonghikai ruh kumjuh.Ki dei ruh ban sam ryntih(uniform/fair distribution) khnang ba baroh ki skul bad ki khynnah ba pule class X kin ioh lut baroh khlem da leh shiliang ia kino kino ki skul.Lada ka sorkar ka lah ban sam ia ki kot SSA sha ki khynnah man la u snem lane ki Tablet(mobile heh) sha man la ki khynnah class XI/XII man la u snem,kam don jingeh ba ia ki class X ruh kin ioh Guide Book sorkar lem man la u snem.Katno klur ka sorkar ka la pyllut ha kaba shon (print) ia kine ki Guide Book ba ka la sam sha ki 64 hajar ngut ki kandidiet SSLC mynta u snem,khlem ioh jingtip namar ym don ba kylli ha kane Assembly ba dang shu dep ruh.Hato! kane ka Guide Book kan dang bteng bad haduh katno snem kan neh ruh,ym don ba tip.Tang kawei kaba ka MBOSE bad ki bor sorkar ki dei ban leh kalong ba kin pyntip bad pynbna paidbah lang solonsar khnang ba ki skul,ki khynnah skul lem bad ki kmie ki kpa jong ki khynnah kin ia tip bad shai lang kdar ban tip ban pynkhreh katkum ka jingbthah ki bor pyniaid Exam khnang ban lait na kino kino ki jingartatien bad jinglyngngoh hadien ha bud.