AIS Suja
Khyndaiphew na ka shispah la dep pyndep ia ki jingiathuhlypa ka ktien u Blei (Bible). Ka pyrthei ka la jan poi ha kaba kut kiei kiei kiba u Blei u la thaw bad pyllong. Ki jingiathuhlypa kiba la dep pyndep kin kylla long tang ki jingiathuhkhana (Prophecy turned history). Hato phi iohi ia kita ki jingiathuhlypa ba la pyndep? Kawei na ki jingiathuhlypa kaba yn sa pyndep shen ka long – Ka Shitaiew bakhadduh, ba la kren da u Daniel Nongiathuhlypa. Ym lah ban iathuh ia ki jingiathuhlypa kiba la dep jia bad pyni sha ka pyrthei.
Ngi ngi long kata ka pateng ka ban iohi ia kata ka jingiathuhlypa da u Daniel kaba ong – “Bad shitaiew yn pynskhem ia ka jutang bad kiba bun; bad hamar kaba shiteng jong kata ka taiew yn pynduh noh ia kata ka jingknia bad ka jingainguh bam; bad halor ka thapniang jong ki jingijli un wan uwei uba pynjot; te wat haduh kaba kut, bad ia kata ruh kaba la thmu, yn theh noh ia ka jingbitar halor uta u Nongpynjot” Daniel 9:27.
Te ka dak kaba shai kdar ba yn iohi ba la sdang ka shitaiew kaba khadduh ka long tang shu pynieng ia ka Temple kaba Lai (Third Temple) ha Jerusalem. Ia mynta hi ki Israel ki la dep pynkhreh nadong shadong ia ki jingdonkam ban pynieng ia kata ka Temple Balai ha Jerusalem, hynrei kim pat ioh kano kano ka hukum na uno uno u nongsynshar ka pyrthei. Tangba ki dak ki paw mynta ba ka long hajan. Ngeit ne phim ngeit tangba u Blei te un pyndep ia ka ktien ba u la kren. “Ka bneng bad ka khyndew kin leit noh, HYNREI KA KTIEN JONG NGA KIN YM LEIT NOH SATIA” Mathaios 24:35. “Kumta, kan long ka KTIEN kaba mih noh na ka shyntur jong Nga: Kan ym phai suda ha Nga, hynrei kan pyndep ia kata kaba Nga sngewbha, kan roi ha kaba Nga la phah ia ka” Isaiah 55:11.
Kumta, tang shu pynieng ia ka Temple kaba Lai ha Jerusalem, kan long ka dak kaba shai kdar ba la sdang ka Shitaiew kaba khadduh. Daniel 9:27.
Ka Shitaiew kaba khadduh ka dei ki 7 snem kiba khadduh na ki 70 Taiew u Daniel. Daniel 9:24. Ka shitaiew ba khadduh ka dei ka por jong ka aiom ot ban pyniakhlad ia u kew na u niut, ka lyngkha ka dei ka pyrthei, kita ki symbai babha ki long ki khun ka hima ki bneng, kita ki niut ki dei ki khun u soitan, uta u nongshun uba la bet ia ki u dei u soitan. Kata ka aiom ot ka long kaba wai noh ka pyrthei, kita kiba ot ki dei ki angel. Mathaios 13:38-39.
Te tang shu pynieng ia ka Temple kaba Lai, kan sdang ki 7 snem ba jynjar bah ia kaba la ong ka shitaiew kaba khadduh. Hapoh kane ka Temple, ki Jiw ne Israel kin pyndep ia kata ka jingai jingknia jong ki ha u Blei (watla um pdiang ka jingknia da ki mrad) kumba Lai snem shiteng. Hamar pdeng ki 7 snem u Mradkhlaw un pynsangeh ia ki Jiw na kata ka jingknia jong ki da ki masi, basaw tlem (red heifers) u Mradkhlaw un iateh jutang bad ki Israel Ka Jutang kaba bad ka Jingiap” Te ka jutang jong phi (Israel) kaba bad ka jingiap (bad u Mradkhlaw) yn pyndam noh” Isaiah 28:18. U Mradkhlaw un pyndam noh ia kata ka Jutang bad ki Israel ka Jutang ka Jingsuk (Peace Treaty), u Mradkhlaw un pyndam noh namar un shong hapoh ka Temple un leh ialade kum u Blei un synshar 42 bnai ne 1260 sngi, lane lai snem shiteng. 2 Thessoloni 2:4. Hapoh kine ki 1260 sngi kan long ka Jynjar bah (great tribulation) namar ki Israel kin shah pyniap kham bun ban ia ki por u Adolf Hitler, kin don ruh ki ban phet rieh bad ba la buhrieh da u Blei ia ki 144000 ngut ki Israel. Jingpynpaw 7:4.
Tang shu kut ki Lai snem shiteng kaba Nyngkong u angel u Blei un pynhap ia u soitan Lucifer sha kane ka pyrthei, dei nangne kein un bsut ha uta u briew ka pop (Man of sin) bad un synshar donbor halor ki Israel bad halor ka pyrthei baroh kawei. Ha kata ka por yn ym don sorkar ne jingsynshar pyrthei shuh hynrei un synshar un pyniaid ma u na Jerusalem ia baroh ki ri ki hima ka pyrthei bad kata ka por kan long tang 1290 sngi. Daniel 12:11.
Ka por jong ka Shitaiew Bakhadduh kan long ruh ka por Jingmihpat kiba iap na Jingtep kan long ruh ka por Jingrongnoh ia kiba la pynkhreh ha ka jingim ha la ka sngi ban iashem ia u Trai Jisu ha suinbneng. 1 Thessoloni 4:15-17. Te kumta “Katba ki (Israel) dang ong – ka jingsuk bad ka jingshem bha, ynda kumta ka jingjot kaba kyndit kyndit kan ngat ha ki kum ka jingsuh khun ha ka briew kaba pun khun, bad kin ym lait shuh da lei lei” 1 Thessoloni 5:2-3. “Namar kata to ngin sharai bad ngin long adkar” 1 Thessoloni 5:6.
To khmih bha ia ki jingiathuhlypa na ka ktien u Blei, ka por kam don shuh shibun ha kane ka pyrthei, 90 na ka 100 percent la pyndep ia ki jingiathuhlypa, kaba sah ka long tang khyndiat. Kumta ka jingiathuhlypa ba la dep jia kin long tang kum ki jingiathuhkhana (prophecies turned history).
“Namar kata, to khie joit me uba iohthiah, bad to mih na kiba iap, TE U KHRIST UN PYNSHAI IA ME” Ephesos 5:14.
Phi don ban ong eiei?