Khyllem u diengbah ka Congress, iasoh BJP U Himanta

Guwahati, 23 Nailar:
Ka jingthmu ki heh Congress, ban kynriah jaka noh sha kiwei pat ki seng sain pyrthei ka la sdang ban paw pyrthei ha kaba kane ka la sdang shuwa na ka jylla Assam ha kaba u radbah jong ka seng Congress ha katei ka jylla u ba dei ruh u myntri sorka barim uba bat ia ka tnad ka koit ka khiah bad ka tnad pule ka Assam u Dr.Himanta Biswa Sharma la ieh noh ia katei ka seng kaba u la long doh longsnam bad u la leit ban pyniasoh noh bad ka BJP.
Katei ka jingleit ia soh BJP u Dr.Himanta ka dei ruh tang sa shisnem ban poi noh ka elekshon MLA ha Assam, la ong ba utei u radbah ka seng Congress u la phah ia ka shithi iehnoh kam jong u mynta ka sngi sha ka All India Congress Committee bad la ong ba u la leit ban ia soh noh bad ka seng BJP.
Tang mar ia risain na ka seng Congress la ong ba u Dr.Himanta u la leit ban ia kynduh ia u President Rangbah ka BJP u Amitshah ha iingsah jong u ha Delhi ha kaba la ong ba la donlang ruh u President ka BJP na Assam u Siddhartha Bhat tacharjee.
Ki tyllong khubor ki la iathuh ba katei ka jingleit ia soh BJP utei u heh Congress ka dei kaba la dep ia kren sop sop lypa la hynriew bnai mynta bad ki heh ka BJP hynrei kam shym la paw pat shabar tad haduh mynta ka sngi bad la ong ba haduh ka sngi saitjain jong kane ka taiew kaba dang shu dep ruh u Dr.Himanta um pat pynpaw pyrthei hynrei u dang pyni ba u dei u nongialam ba pura ka seng Congress ha kaba u la leit ban ialap na bynta katei ka seng ha ka elekshon jong ka Tiwa Autonomous Council, bad katei ka jingrisain jong u ka la pynkyndit ia ka seng Congress.
Shuh shuh la iathuh ba haduh mynta u Dr.Himanta u la mih dang marwei hi na ka seng Congress , hynrei la ong ba ka la don ka jingiakren lypa bad kiwei pat ki nongbud jong u kiba dei ki nongialam ba kham hapoh jong ka seng Congress ha Assam bad ba shen ruh kitei ki nongbud jong u kin leit ban pyniasoh lang noh bad ka BJP.
Lah ban kdew ba ha kane ka jylla ruh, ki la don bun ngut ki nongialam bad ki radbah ka seng Congress kiba la buhrieh kyrteng kiba la pynpaw ha u nongthohkhubor ba ki la ngiah la kdang ia ka seng jong ki bad ki la don ka jingthmu ban leit pyniasoh noh bad kawei pat ka seng sain pyrthei, hynrei ki la ong ba ki shu ap tang ia ka por kaba biang namarba mynta ki dang bishar bniah sha kano ka seng ba kin leit iasoh ne kin thaw noh da kawei pat ka seng.